गोल्याण ग्रुपका प्रबन्ध निर्देशक अक्षय गोल्याणले जेनजी आन्दोलनका क्रममा सहिद भएका परिवारका बालबालिकालाई दीर्घकालीन सहयोग गर्ने प्रतिबद्धता जनाएका छन् । उनले सामाजिक सञ्जाल लिंकदिनमा भिडियो पोस्ट गर्दै उनले अभिभावकसँगै बालबालिकाले जीवनबाट सुरक्षाको सुनिश्चितता गुमाएको उल्लेख गर्दै हामी शैक्षिक सहयोगमार्फत उनीहरूको सपना पूरा गर्न अगाडि सरेको बताएका छन् ।
गोल्याण ग्रुपले यसअघि नै सहिद परिवारका ३२ बालबालिकालाई मासिक ४० हजार रुपैयाँसम्मको छात्रवृत्ति घोषणा गरिसकेको छ । कक्षा–१२ सम्मको शिक्षाका निम्ति प्रतिविद्यार्थी वार्षिक चार लाख ८० हजार रुपैयाँसम्मको छात्रवृत्तिका लागि ग्रुप, विद्यालय र अभिभावबीच त्रिपक्षीय सम्झौता पनि भइरहेको छ । विश्व बाल दिवसको अवसर पारेर ग्रुपले बालबालिकालाई ‘किड्स–प्ले डेट’मा निम्त्याएको थियो ।
त्यहाँ उनीहरू एकापसमा रमाउँदै खेलेको भिडियो पोस्ट गर्दै प्रबन्ध निर्देशक गोल्याणले भनेका छन्, “यहाँ उनीहरूलाई निम्त्याइएको केबल मनोरन्जनका लागि मात्र होइन, बरु हरेक बालबालिकाले खुसी र सुरक्षाबोधका साथ जीवनप्रति आशावादी हुने हक राख्छन् भनेर स्मरण गर्न पनि हो ।” प्रबन्ध निर्देशक गोल्याणले बालबालिकाको मुस्कानले अर्थपूर्ण सन्देश प्रवाह गरेको पनि बताएका छन् । ‘कहिलेकाहीँ सामान्य क्षणहरूले पनि हामीलाई गहिरो पाठ सिकाउँछन् । उनीहरूमा देखिएको हाँसो, सिर्जनशीलता र ऊर्जाले साँच्चिकै सुन्दर भविष्यको संकेत गरेको छ,” लिंकदिनमा उनले भनेका छन् ।
