नेकपा एमालेका सांसद सुहाङ नेम्वाङले संसदीय दलको नेतामा औपचारिक रूपमा आफ्नो दाबी प्रस्तुत गरेका छन् । च्यासलमा जारी संसदीय दलको बैठकमा नेम्वाङले वर्तमान राजनीतिक परिस्थिति र जनभावनालाई ध्यानमा राख्दै दलको नेतामा आफ्नो दाबि पेश गरेका हुन् ।
बैठकमा युवा सांसद नेम्वाङले पार्टीको विधि, पद्धति र अग्रज नेताहरूको भूमिकाप्रति सम्मान व्यक्त गर्दै आफू जिम्मेवारी वहन गर्न तयार बताएका छन् ।
उनले भने– ‘पार्टीको विधि पद्धति र अग्रजहरूको भूमिकालाई सम्मान गर्दै म जिम्मेवारी निभाउन तयार छु । देशमा उत्पन्न वर्तमान परिस्थिति हामीले नजरअन्दाज गर्न पक्कै हुँदैन । सदन र सदन बाहिरको अवस्था हामी बुझ्न सक्छौँ ।’
उनले आफ्नो दाबीलाई अग्रज नेतृत्वविरुद्धको प्रतिस्पर्धाका रूपमा नलिन आग्रह गर्दै वर्तमान आवश्यकता अनुसार युवाको ऊर्जा र अग्रजको अनुभवको संयोजन आवश्यक रहेको धारणा व्यक्त गरेका छन् ।
