काठमाडौँ – सर्वोच्च अदालतले आफ्नो कार्य समयसम्बन्धी व्यवस्था संशोधन गर्दै सातामा दुई दिन बिदा दिने प्रणाली लागू गरेको छ। नेपाल राजपत्रमा प्रकाशित सूचना अनुसार सर्वोच्च अदालत (तेस्रो संशोधन) नियमावली, २०८२ मार्फत अदालतको कार्यसमयसम्बन्धी प्रावधान परिवर्तन गरिएको हो।
राजपत्रमा प्रकाशित व्यवस्थाअनुसार सर्वोच्च अदालत नियमावली, २०७४ को नियम ३ मा संशोधन गरी अदालतको कार्य समय पूर्ण बैठकले तोकेबमोजिम हुने व्यवस्था गरिएको छ। साथै, नेपाल सरकारले सार्वजनिक बिदा तोकेको दिन र पूर्ण बैठकले अदालत बन्द रहने निर्णय गरेको दिन अदालत बन्द रहने उल्लेख गरिएको छ।
संशोधित व्यवस्थाअनुसार अब अदालत शनिबार र आइतबार दुई दिन बिदा रहनेछ। सोमबारदेखि शुक्रबारसम्म बिहान १०:०० बजेदेखि अपराह्न ५:०० बजेसम्म अदालत सञ्चालन हुने व्यवस्था गरिएको छ। यद्यपि कात्तिक १६ गतेदेखि माघ १५ गतेसम्म भने अदालत अपराह्न ४:०० बजेसम्म सञ्चालन हुने जनाइएको छ।
सर्वोच्च अदालतको पूर्ण बैठकले २०८२ मंसिर २३ गते उक्त निर्णय गरेको उल्लेख गर्दै सम्बन्धित सबैको जानकारीका लागि सूचना प्रकाशित गरिएको जनाइएको छ।
यसअघि सरकारले शनिबार र आइतबार सार्वजनिक बिदा दिने तथा कार्यालय समय बिहान ९ बजेदेखि साँझ ५ बजेसम्म कायम गर्ने निर्णय राजपत्रमार्फत लागू गरिसकेको छ।
