दक्षिण अमेरिकामा शुक्रबार बिहान शक्तिशाली भूकम्प गएको छ । दक्षिण–पश्चिम एटलान्टिक र दक्षिण–पूर्वी प्यासिफिक ओसनलाई जोड्ने ड्रेक जलमार्गमा भूकम्पको केन्द्रविन्दू रहेको बताइएको छ । अमेरिकी भूगर्भ सर्वेक्षण (यूएसजीएस)का अनुसार, भूकम्पको तीव्रता सुरुमा ८ म्याग्निच्युड मापन गरिएको थियो ।
तर, पछि यसलाई संशोधन गरी ७.५ कायम गरिएको छ । यो क्षेत्र दक्षिण अमेरिकाको केप हर्न र अन्टार्टिकाको दक्षिण शेटल्यान्ड टापुहरूबीचमा छ । ड्रेक जलमार्ग, दक्षिणी चिली र अन्टार्टिकाबीचको सुदूर समुद्री क्षेत्र, जटिल टेक्टोनिक सीमाहरूनजिक पर्छ । यहाँ भूकम्पीय गतिविधि सामान्य हुन्छ ।
हालसम्म कुनै हताहत वा संरचनात्मक क्षतिको खबर आएको छैन । यसको केन्द्र ३६ किलोमिटर गहिराइमा थियो । यो पूर्वमा एट्लान्टिक महासागरलाई पश्चिममा प्रशान्त महासागरसँग जोड्छ । ड्रेक जलमार्गको चौडाइ कम्तीमा ८०० किलोमिटर छ ।
