आज विश्व ताल दिवस, पारिस्थितिक प्रणालीको संरक्षण, पुनःस्थापना र दिगो व्यवस्थापन गर्ने उद्देश्यका साथ आज विश्वका विभिन्न मुलुकमा यो दिवस मनाईदैछ । संयुक्त राष्ट्रसङ्घको गतवर्षको महासभामा यो दिवस मनाउने सम्बन्धि प्रस्ताव पारित भएसँगै यो वर्षदेखि विश्व ताल दिवस मनाईने भएको हो ।
संयुक्त राष्ट्रसङ्घका अनुसार पृथ्वीको जमिनमध्ये ४ प्रतिशत ओगटेका कुल ११ करोड ७० लाखभन्दा बढी ताल छन् । प्रदूषण र ‘मिथेन’ उत्सर्जनका कारण वातावरणीय नोक्सानिका साथै ताजा पानीका स्रोतहरू घट्दै गएको सन्दर्भमा यो दिवस मनाउनुको सान्दर्भिकता बढेको छ ।मानवका निम्ति पेयजलको आपूर्ति, कृषि र उद्योगका लागि उत्पादनको महत्त्वपूर्ण स्रोत तालहरूले जैविक विविधता कायम राख्न अनगिन्ती प्रजातिका माछा, बोटबिरुवा र वन्यजन्तुलाई जीवन दिएका छन् । बढ्दो विश्वव्यापी तापक्रम वृद्धिले तालहरू सुक्दै गएका छन्भने बरफ पग्लने क्रम पनि बढिरहेको सन्दर्भमा तालतलैयाको संरक्षणलाई महत्त्वपूर्ण मानिएको छ ।
नेपालमा पनि ठूलो संख्यामा तालहरु रहेको तथ्याङ्क पाईन्छ । नेपालमा रहेका तालमध्ये सबैभन्दा ठूलो ताल कर्णाली प्रदेशको रारा ताल हो । त्यसैगरी कर्णाली प्रदेशमा नै अवस्थित फोक्सुण्डो ताल नेपालको सबैभन्दा गहिरो ताल हो, जसको गहिराई १३६ मिटर रहेको छ । गण्डकी प्रदेशमा पर्ने तिलिचो ताल समुन्द्र सतहबाट नेपालको सबैभन्दा अग्लो स्थानमा अवस्थित ताल हो । विकिपिडीयाका अनुसार मकवानपुर जिल्लाको कुलेखानी जलविद्युत परियोजनाका लागि निर्माण गरिएको इन्द्र सरोवर नेपालको सबैभन्दा ठूलो मानव निर्मित ताल हो । त्यसबाहेक पोखराको फेवा, बेगनास, रुपा ताल नेपालका पर्यटकिय दृष्टिले आकर्षक मानिन्छन् ।