ऊर्जा जलस्रोत तथा सिंचाई मन्त्रालयका सचिव सुरेश आचार्यको ठाउँमा प्राविधिक सचिव बन्न ऊर्जाका तीन सहसचिव प्रतिस्पर्धामा उत्रिएका छन् । सुरेश आचार्य यहीँ भदौ १५ गतेबाट ५८ वर्षे उमेर हदका कारण अनिवार्य अवकाशमा गएका कारण खाली रहेको उर्जा सचिव बन्नका लागि तीन सहसचिवबीच प्रतिस्पर्धा देखिएको हो । उर्जा मन्त्रालय उच्च स्रोतका अनुसार सहसचिव चिरञ्जीवी चटौत, जगदिश्वर कर्माचार्य र नवीनराज सिंह सचिव बढुवाको प्रतिस्पर्धा छन् ।
चटौत र सिंह हाइड्रोपावर उपसमूहका । कर्माचार्य मेटेरियोलोजी समूहका सहसचिव हुन् । इन्जिनियरिङ सेवाका यी दुबै समूह/उपसमूहको सेवा सञ्चालन ऊर्जा, जलस्रोत तथा सिंचाई मन्त्रालय नै गर्छ । चटौत र सिंहले विद्युत विकास विभागका महानिर्देशक जिम्मेवारी सम्हालिसकेका हुन् । कर्माचार्यले भने जल तथा मौसम विज्ञानका महानिर्देशकको जिम्मेवारी पूरा गरेका हुन् । चटौत र सिंह अहिले उर्जा ऊर्जा मन्त्रालयमा कार्यरत छन् भने कर्माचार्य जल तथा ऊर्जा आयोगको सचिवालयमा कार्यरत छन् । २०७० फागुन ३० गते सहसचिव भएका चटौतको जागिर २०८३ असार १५ गतेसम्म छ । उनी ५८ वर्ष उमेर हदका कारण चालू आर्थिक वर्षमै अनिवार्य अवकाशमा जाने सूचीमा छन् । १० महिना मात्र सचिव चलाउन पाउने भएको र वरिष्ठ सहसचिव पनि भएकाले चटौत नै इन्जिनियरिङ क्लष्टरको विशिष्ट श्रेणी सहसचिवमा बढुवा हुने उच्च सम्भावना छ ।
चटौतसँगै एकैदिन सहसचिव भएका कर्माचार्य यसअघिको सचिव बढुवाको सिफारिसमा उनीभन्दा पछि परेका थिए । एक नम्बरमा दिनानाथ मिश्र, दुई नम्बरमा चिरञ्जीवी चटौत र तीन नम्बरमा नवीनराज सिंह सिफारिस भएका थिए । मिश्र सचिवमा बढुवा भएपछि पहिलो नम्बरमा चटौत उम्लिएका छन् । दोस्रो नम्बरमा सिफारिस हुने कर्माचार्यको जागिर २०८६ असोजमा १५ गतेसम्म छ ।
भौतिक पूर्वाधार तथा यातायात मन्त्रालयका सचिव केशवकुमार शर्मा बिडारी ५८ वर्ष पुगेर चैत ८ गते अनिवार्य अवकाश पाएपछि उक्त ठाउँमा कर्माचार्य सचिवमा बढुवा हुनेछन् । उनी पुरै अवधि सचिव चलाउनेमा पर्छन् । चटौत र कर्माचार्यभन्दा एक हप्ता पछाडि सहसचिव भएका नवीनराज सिंहको जागिर २०८४ साउनसम्म छ । सिंह नेपाल ट्रष्टको कार्यालयका सचिव रामआधार साहले ५८ वर्ष लागेर चैत मसान्तमा अनिवार्य पाएपछि सचिव बढुवा हुनेछन् । उनको ६० वर्षसम्म जागिर कायम रहने देखिन्छ ।
