अमेरिकी राष्ट्रपति डोनाल्ड ट्रम्पले गाजाको युद्ध अन्त्य गर्न भइरहेको प्रयासलाई छिटो अघि बढाउन आग्रह गरेका छन्। सोमबारदेखि इजिप्टमा हमास र इजरायलबीच शान्ति वार्ता सुरु हुने तयारी भइरहेको बेला ट्रम्पले यस्तो बताएका हुन् ।
ट्रम्पले सामाजिक सञ्जालमार्फत पहिलो चरणको वार्ता यसै हप्ताभित्र पूरा हुने दाबी गरेका छन्। उनले समय अति महत्वपूर्ण छ, ढिलाइ भए ठूलो रक्तपात हुनेछ पनि उल्लेख गरेको छन् ।
यसअघि हमासले अमेरिकी २० बुँदे शान्ति योजनाका केही अंश स्वीकार गरेको छ, जसमा बन्धक मुक्त गर्ने र गाजाको शासन प्राविधिक सरकारलाई दिने प्रस्ताव गरिएको छ। तर, हमासले आफ्ना हतियार फिर्ता गर्ने र भविष्यमा शासन नगर्ने बारेमा भने प्रस्तावमा केही उल्लेख गरिएको छैन।
यता इजरायली सेनाले भने गाजामा हवाई आक्रमण रोक्न अमेरिकाले गरेको आग्रहपछि पनि बमबारी जारी राखेको छ। इजरायली प्रवक्ता शोश बेड्रोसियनले पूर्ण युद्धविराम नभएको भन्दै आवश्यक परे आत्मरक्षाका लागि आक्रमण जारी राख्ने बताएका छन्।
