संयुक्त राष्ट्र संघका महासचिव एन्टोनियो गुटेरेसले इजरायल र हमासबीचको युद्धविराम घोषणालाई ऐतिहासिक अवसर भनेको छन् । महासचिव गुटेरेसले आफ्नो सन्देश सामाजिक सञ्जाल ‘एक्स’मार्फत् सो घोषणाको स्वागत पनि गरेका छन्।
उनले यो सम्झौताबाट मध्यपूर्वमा लामो समयदेखिको युद्ध टुंगिएर दुई राष्ट्र समाधानतर्फको विश्वसनीय राजनीतिक बाटो खोल्ने बताएका छन् । राष्ट्र संघ महासचिवले यो सहमतिलाई प्यालेस्टाइनी भूभागमा इजरायली कब्जा अन्त्य गर्न सहयोग पुर्याउने महत्त्वपूर्ण काम भनेका छन् ।
गुटेरेसले संयुक्त राज्य अमेरिका, कतार, इजिप्ट र टर्कीको कूटनीतिक प्रयासको पनि प्रशंसा गरेका छन् । संयुक्त राष्ट्र संघले अब गाजामा राहत, पुनःर्निर्माण र पुनःस्थापनाका प्रयासलाई अझ तीव्र बनाउने महासचिव गुटेरेसको भनाई छ । उनले सबै पक्षलाई सम्झौताका सर्त पूर्ण रूपमा पालना गर्न आग्रह गरेका छन् ।
