हिमाली जिल्लाहरुमा आज ब्यापक हिमपात भईरहेको छ । हिमाली जिल्ला मुस्ताङसहितका अन्य जिल्लामा हिमपात भईरहेको हो । चाडवाडको समयपछि ती जिल्लाहरुमा आन्तरिक तथा बाह्य पर्यटकको भीड बढेको छ । यसै क्रममा विभिन्न जिल्ला प्रशासन कार्यालयले हिमपातका बेला पदयात्रा गर्नेहरुका लागि सचेत समेत गराएको छ । मौषमका बारेमा पूर्व सूचना लिएर मात्र पदयात्रा गर्न प्रशासनले आग्रह गरेको हो ।
उल्लेखित उपायहरु अपनाउदा हिमपातका बेला सुरक्षित रहन सकिन्छ ।
हिमपातका कारण अत्यधिक चिसो हुने तथा अन्य जोखिम उत्पन्न हुन सक्ने भएकोले सावधानी अपनाऔं। शरीरको सबै भाग ढाक्ने गरी बाक्लो र न्यानो लुगा लगाउँ। सुत्दा न्यानो सिरक, कम्मलजस्ता ओढ्ने प्रयोग गरौं, छाती तथा टाउको अनिवार्य रुपमा ढाकौं।
बेलाबेला तातो पानी, पोषिलो तातो झोल पदार्थ प्रशस्त मात्रामा पिउने गरौं। बालबालिका, गर्भवती, सुत्केरी एवं ज्येष्ठ नागरिकहरूको विशेष हेरचाह गरौं।
ज्वरो आए, झाडा पखाला लागे, दम बढे, खोकी लागे, घ्यार घ्यार भए, सास फेर्न कठिन भए स्वास्थ्यकर्मीलाई सम्पर्क गरौं। चिसो वा भिजेको कपडा नलगाउँ। (चिसो कपडाले शरिरको तापक्रम झन् छिटो घटाउँछ।)
दुध चुस्ने बच्चालाई नियमित रुपमा स्तनपान गराउँ। न्यानो पार्न कोठामा आगो वा हिटर बाल्दा सबै झ्यालढोका बन्द नगरौं, हावा ओहोरोदोहरो हुने व्यवस्था गरौं।
हिउँ वा बरफ नखाउँ। पानी जमे बरफ तताएर पानी बनाउँ। हिमपात भइरहेका बेला अत्यावश्यक कामबाहेक बाहिर हिँडडुल नगरौं।
हिमपात वा तुसारो जमेको ठाउँमा सवारी चलाउँदा चिप्लिएर दुर्घटना हुनसक्ने भएकोले सावधानी अपनाउँ। पदयात्री एवं पर्वतारोहीले पर्याप्त सुरक्षा प्रबन्ध गरेर मात्र यात्रा गरौं।
