बालाजु औद्योगिक क्षेत्रमा रहेको सूर्य फुड प्रोसेसिङ इन्डस्ट्रिजले कानुनी अनुमति बिना विभिन्न खाद्य पदार्थहरूको उत्पादन, प्याकेजिङ तथा बिक्री–वितरण गरिरहेको पाइएको छ ।
खाद्य प्रविधि तथा गुण नियन्त्रण विभागको अनुगमनका क्रममा उद्योगले आटा, मैदा, सुजि, फिङ्गर चिप्स, बेसनलगायतका खाद्य वस्तुहरूको उत्पादन तथा बिक्री–वितरण गर्दै आएको र अन्य खाद्य पदार्थ उत्पादनका लागि लिएको अनुमतिपत्रसमेत समयमा नवीकरण नगरेको तथ्य भेटिएको छ ।
उद्योग परिसरमा अवैध तरिकाले कन्काई डेरी प्रोडक्ट्स प्रालि कन्काई–२, झापा लेखिएको लेबल प्रयोग गरी नौनी पगाली घ्यू उत्पादन गरेको पाइएको विभागले जनाएको छ । विभागका अनुसार सो क्रममा करिब ४०० थान लेबल, ५०० मिलिका ३६ थान र १ लिका ३३ थान प्याक गरिएको घ्यू तथा करिब ५० केजी कच्चा घ्यू बरामद गरिएको हो।
थप अनुसन्धानका लागि विभागले नमुना संकलन गरेको छ भने सम्बन्धित उद्योगीलाई तीन दिनभित्र सम्पूर्ण कागजातसहित विभागमा उपस्थित हुन निर्देशन दिएको छ।
