गरिमा विकास बैंकको १९औँ वार्षिक साधारणसभाबाट लाभांश वितरण गर्ने प्रस्ताव पारित भएको छ । शुक्रबारको साधारणसभाले सेयरधनीलाई गत आर्थिक वर्षको मुनाफाबाट १०.५३ प्रतिशत लाभांश वितरणको प्रस्ताव पारित गरेको हो । जसमा ६ प्रतिशत बोनस सेयर र ४.५३ प्रतिशत नगद (करसहित) रहेको छ ।
सभाले अन्य बैंक तथा वित्तीय संस्थालाई गाभ्न–गाभिन उपयुक्त बैंक तथा वित्तीय संस्था खोजी गर्ने, उपयुक्त संस्थासँग मर्जर तथा एक्विजिसनका साथै पुँजी वृद्धि गर्नेलगायतका विभिन्न प्रस्ताव पारित गरेको थियो । सभामा बैंक सञ्चालक समितिका अध्यक्ष दिलीपप्रताप खाणले १७ कात्तिकसम्म कायम रहेका सेयरधनीले मात्र उक्त लाभांश पाउने जानकारी दिए ।
सभाले विशेष प्रस्तावका रूपमा बैंकको हालको चुक्ता पुँजी बढाएर ६ अर्ब १० करोड पुर्याउने प्रस्तावसमेत पारित गरेको छ । बैंकको हालको चुक्ता पुँजी पाँच अर्ब ६८ करोड पाँच लाख रहेकामा सभाले पारित गरेको ६ प्रतिशत बोनस सेयरले हुन आउने रकम ३४ करोड आठ लाख ३१ हजार थप गरी ६ अर्ब १० करोड पुर्याउने निर्णय गरेको हो ।
साथै, सभाले सञ्चालक समितिको वार्षिक प्रतिवेदन, लेखा परीक्षकको प्रतिवेदन पारित गर्नुका साथै चालू आवका लागि लेखा परीक्षक नियुक्त गरी निजको पारिश्रमिक पनि निर्धारण गरेको छ ।
