नेपाल राष्ट्र बैंकले ४ खर्ब ३० अर्ब बराबरको नोट छाप्ने गरि ठेक्का लगाएको छ । राष्ट्र बैकले २ अर्ब ३९ करोड रुपैयाँ लागतबराबरको ठेक्का चाइना बैंक नोट प्रिन्टिङ एण्ड मिन्टिङ कर्पोरेसन बेइजिङलाई जिम्मा दिने निर्णय गरेको हो ।
लागत अनुसार एक हजार दरको नोट छाप्न अहिलेको विनिमय दर अनुसार ५ रुपैयाँ ५६ पैसा लाग्ने देखिएको छ । यस अन्तर्गत १ हजार रुपैयाँ दरका ४३ करोड थान नोट छपाई हुनेछ ।
यसका लागि राष्ट्र बैंकले गत भदौ १० गते बोलपत्र आह्वान गरेको थियो । रीतपूर्वक पेस हुन आएको न्यूनतम मूल्यांकित सारभूत रुपमा प्रभावग्राही बोलपत्रदाता चिनियाँ कम्पनीसँग ११ मंसिर २०८२ मा सम्झौता भएको बैंकले जनाएको छ ।
सार्वजनिक खरिद (चौधौँ संशोधन, २०८२) नियमावली, २०६४ को दफा १३७ तथा नोट छपाइ तथा सिक्का टकमरीसम्बन्धी निर्देशिका, २०६५ को दफा ५४ को व्यवस्थाबमोजिम सर्वसाधारणको जानकारी गराएको बैंकले जनाएको छ ।
