काठमाडौँ- प्रतिनिधि सभा निर्वाचनअन्तर्गत अछाम जिल्ला क्षेत्र नं. २ मा उम्मेदवारी समायोजन गरिएको छ । राष्ट्रिय स्वतन्त्र पार्टीका उम्मेदवार भूपदेव शाहलाई उज्यालो नेपाल पार्टीका उम्मेदवार राजेश रावलले समर्थन गर्ने सहमति भएको हो ।
आइतबार भएको आपसी समझदारीअनुसार रावलले आफ्नो उम्मेदवारी फिर्ता लिँदै शाहको पक्षमा समर्थन जनाउने निर्णय गरिएको बताइएको छ । लोकतान्त्रिक मूल्य-मान्यता, सुशासन, पारदर्शिता तथा राजनीतिक परिवर्तनका साझा एजेन्डालाई सुदृढ बनाउने उद्देश्यले सहकार्य गर्ने सहमति भएको जनाइएको छ ।
सहमति दस्तावेजअनुसार शाहले अछाम क्षेत्रको पूर्वाधार विकास, रोजगारी सिर्जना, भ्रष्टाचारविरुद्ध शून्य सहनशीलता नीति अवलम्बन, कृषि तथा स्थानीय उत्पादनको संरक्षण-प्रवर्द्धन तथा दुर्गम क्षेत्रका नागरिकसम्म राज्य सेवा प्रभावकारी रूपमा पुर्याउनेलगायत विषयलाई प्राथमिकतामा राख्ने प्रतिबद्धता व्यक्त गरेका छन् ।
उज्यालो नेपाल पार्टीले पनि शाहको पक्षमा चुनावी अभियान सञ्चालन गर्ने उल्लेख गरिएको छ । सहमति पत्रमा दुवै उम्मेदवारको हस्ताक्षर रहेको जानकारी दिइएको छ ।
