काठमाडौं— रामबहादुर थापा बादललाई नेपाल कम्युनिस्ट पार्टी (एमाले)को प्रतिनिधि सभा संसदीय दलको नेतामा सर्वसम्मत रूपमा चयन गर्ने तयारी गरिएको छ।
इलाम क्षेत्र नम्बर २ बाट निर्वाचित युवा नेता सुहाङ नेम्बाङले नेतृत्वका लागि चुनावी प्रतिस्पर्धा गर्ने इच्छा व्यक्त गरे पनि उनको प्रस्तावक र समर्थक बन्न कुनै सांसद तयार नभएपछि उनी एक्लिएका छन्।
संसदीय दलको नेताका लागि चुनाव गराउने प्रारम्भिक तयारी भए पनि अन्ततः सुहाङको पक्षमा आवश्यक समर्थन नजुट्दा बादल निर्विरोध हुने अवस्था बनेको हो।
एमाले अध्यक्ष केपी शर्मा ओलीको निर्देशनमा बादललाई सर्वसम्मत बनाउने प्रक्रिया अघि बढाइएको स्रोतले जनाएको छ। सुहाङको पक्षमा उभिने संकेत दिएका केही नेताहरू पनि अन्तिम समयमा पछि हटेका छन्।
स्रोतका अनुसार, “हामी चुनावमा जान तयार थियौँ, तर सुहाङ कमरेडका लागि प्रस्तावक र समर्थक कोही खुलेर आउन सक्नुभएन। अब बादल कमरेड नै सर्वसम्मत रूपमा संसदीय दलको नेता चयन हुनुहुनेछ।”
