नेपाली काँग्रेसका नेता एवं प्रतिनिधी सभा सदस्य अर्जुननरसिंह केसीले ससुरा–ज्वाइँको ट्याग भिराएर आफू र पार्टी सभापति गगनकुमार थापामाथि प्रहार गर्न खोजिएको आरोप लगाएका छन् । केसीले आफूलाई पार्टी सभापति थापाको ससुरा भएकै कारण अवसर पाएको भनि हुने गरेका टिप्पणीले आफूलाई फरक नपर्ने बताएका हुन् ।
वि.स. २०१७ पुस १ गते राजा महेन्द्रले गरेको ‘कू’ विरुद्ध पर्चा बाँड्दै गर्दा आफूले जेल जीवन शुरु गरेको र पार्टी जीवनमा आफ्नो छुट्टै पहिचान भएको केसीको दाबी छ । पार्टी निर्माण र लोकतन्त्र संस्थागत गर्न आफूले गरेको योगदानबारे थाहा नभएकाहरुले सभापति थापाको ससुराको रुपमा मात्र चिन्ने गरेको भन्दै तिनीहरुलाई जवाफ दिइरहनुनपर्ने उनको जिकिर छ ।
पशुपति दर्शन छिद्राको व्यापार भनेजस्तै आफ्नो नाम सभापति थापासँग जोडेर हुने गरेको टिकाटिप्पणीहरु बनीबनाउ षड्यन्त्र भएको पनि केसीले तर्क गरे । केसीले नेपाली काँग्रेसभित्रै बाट आफ्नो पहिचान गगन थापाको ससुराको रुपमा मात्र सिमित गर्ने प्रयास गरिएको भन्दै आपत्ति समेत जनाए ।
पूर्वप्रधानमन्त्री गिरिजाप्रसाद कोईराला, नेतृ शैलजा आचार्य र पूर्वप्रधानमन्त्री सुशील कोईरालासहितको प्रसंग निकाल्दै केसीले पार्टीमा कयौँ नेताहरुले आफ्नै योगदानका आधारमा भुमिका पाएको भन्दै पारिवारिक सम्बन्धलाई मात्र आधार बनाएर आलोचना गर्नु उचित नहुने पनि उल्लेख गरेका छन् ।
उनले भने , ‘२०१८ साल वैशाख ५–६ गते २०१७ सालको राजाको कदमको विरुद्ध पर्चा बाँड्दै गर्दा जेल परेर जुन यात्रा अर्जुन नरसिंहको बारेमा केही थाहा नभएर मलाई केही थाहा नभएको खाली गगनको ससुरा मात्रै चिनेका पत्रकारहरूलाई अथवा सामाजिक सञ्जालको मान्छेलाई मैले के जवाफ दिइरहने ?’
केसीले पार्टीमा योगदान दिनेहरुमाथी प्रश्न उठाउने कुरा ठिक नभएको पनि बताए । उनले भने–‘शैलजा आचार्यको आफ्नै इतिहास थियो, आफ्नै योगदान थियो । कसैले प्रश्न उठाउने कुरा पनि भएन । उहाँ त्यही बेलामा गिरिजाबाबु हुँदा मन्त्री उपप्रधानमन्त्री भएको होइन ? अनि गिरिजाप्रसाद कोईराला सभापति हुँदाहुँदै उपसभापति सुशील कोईरालालाई दिएको होइन ? नाता भनेर एउटा काँचो मान्छे कहिल्यै नचिन्या मान्छेलाई कसैले ल्याएको भए यो एउटा प्रश्न हुन्छ ।’
पार्टी निर्माण र व्यवस्था पुनःस्थापनाका लागि आफूले गरेको योगदानबारे सबैलाई जानकारी गराएर सञ्चारकर्मीहरुले आफूलाई न्याय गर्नुपर्ने केसीको भनाइ छ । उनले आफू रुपान्तरण र पुस्तान्तरणको वकालत गर्ने भएकै कारण विशेष अधिवेशनको पक्षमा उभिएको दाबी समेत गरे । काँगस्रे बदलिएको हेर्न नचाहानेहरुले आफूमार्फत सभापति थापामाथि प्रहार गर्न खोजेको भन्दै त्यसले केही फरक नपर्ने पनि स्पष्ट पारे ।
