काठमाडौं -राष्ट्रिय स्वतन्त्र पार्टी (रास्वपा)की सांसद निशा डाँगीले प्रतिनिधिसभामा रास्वपाले पाएको सिट जनअसन्तोष र परिवर्तनप्रतिको तीव्र चाहनाको अभिव्यक्ति भएको बताएकी छन् । सोमबार प्रतिनिधिसभा बैठकको विशेष समयमा बोल्दै उनले रास्वपाले पाएको सिट एआई र अल्गोरिदमको खेल नभएको बताइन् ।
‘आजको यो सदन केवल अंकगणितीय बहुमतको परिणाम होइन, यो जनचेतनाको पुनर्जागरणबाट जन्मिएको सदन हो । राष्ट्रिय स्वतन्त्र पार्टीले प्राप्त गरेको झण्डै दुईतिहाइ बहुमत आकस्मिक घटना वा एआई र अल्गोरिदमको खेल होइन, बरु लामो समयदेखि संचित जनअसन्तोष र परिवर्तनप्रतिको तीव्र चाहनाको अभिव्यक्ति हो भन्ने कुरा म यस सदनमा राख्न चाहन्छु, त्यसैले पनि हामीले यसपटक जनताको मतको पूर्ण सम्मान गर्दै अगाडि बढ्नु पर्नेछ,’ उनले बैठकमा भनिन् ।
उनले राष्ट्रहितमा राजनीतिक दलहरूबीच सहकार्य अनिवार्य रहेको बताइन् । उनले राजनीति आरोप–प्रत्यारोपका लागि नभई परिवर्तनका लागि गर्नुपर्ने बताइन् । ‘राष्ट्रहितमा सहकार्य अनिवार्य छ,’ डाँगीले भनिन्, ‘राजनीति आरोप–प्रत्यारोपको मात्रै होइन, परिवर्तनका लागि गर्नुपर्ने बेला आएको छ ।’
आफूहरू सदन र सरकारमा शासन होइन, सेवा गर्न आएको उनको भनाइ थियो । सरकार र सदनले यही भावनाले निर्णय गर्नुपर्ने डाँगीले बताइन् ।
