काठमाडौ – अमेरिका र इरान बीच युद्धबिराम भएको खबर सार्वजनिक भएसँगै विश्व बजारमा सकारात्मक संकेत देखिएको छ। लगानीकर्ताको आत्मविश्वास बढ्दा अमेरिकी स्टक फ्युचर्समा वृद्धि भएको छ भने तेलको मूल्यमा उल्लेखनीय गिरावट आएको छ।
अमेरिकी कच्चा तेलको मूल्य १७ प्रतिशतभन्दा बढीले घटेर प्रति ब्यारेल ९२ डलरमा झरेको छ। विश्लेषकहरूका अनुसार मध्यपूर्व क्षेत्रमा तनाव कम हुँदा आपूर्ति जोखिम घट्ने भएकाले तेल बजारमा तुरुन्त प्रभाव परेको हो।
यसअघि डोनाल्ड ट्रम्प ले इरानका पुल र पावर प्लान्टहरू ध्वस्त पार्ने चेतावनी दिएका थिए। उक्त अभिव्यक्तिपछि विश्वभर आलोचना भएको थियो। संयुक्त राष्ट्र संघ लगायत अन्तर्राष्ट्रिय निकायहरूले यस्तो कदमले द्वन्द्व थप चर्किने भन्दै चिन्ता व्यक्त गरेका थिए। साथै, पोप लियोले पनि शान्तिको अपिल गर्दै हिंसात्मक कदमको विरोध गरेका थिए।
उता, अमेरिका मा मध्यावधि चुनाव नजिकिँदै गर्दा ट्रम्पको लोकप्रियता घट्दै गएको देखिएको छ। बढ्दो इन्धन मूल्य र सम्भावित युद्धका कारण सर्वसाधारण नागरिकमा असन्तुष्टि बढेको बताइएको छ।
विशेषज्ञहरूका अनुसार यदि युद्धबिराम दीर्घकालीन रूपमा कायम रह्यो भने विश्व अर्थतन्त्रमा थप स्थिरता आउने र ऊर्जा बजार अझै सन्तुलित हुने अपेक्षा गरिएको छ।
