नवनियुक्त प्रहरी महानिरीक्षक चन्द्रकुवेर खापुङले आफ्नो सिमितता प्रति जानकार रहेको भन्दै कार्यकालमा सकेको राम्रो गर्ने बताएका छन् ।
गृह मन्त्रालयमा बिहीबार आयोजित दर्ज्यानी चिह्न सुशोभन समारोहमा आईजीपी खापुङले भने, ‘सकेको राम्रो गर्छु तर, नराम्रो गर्नेछैन । मेरा सीमितता प्रति जानकार छु तर, राम्रो गर्ने प्रयास गर्नेछु ।’
खापुङले आफू स्वेच्छाले रोजेर प्रहरी बनेको उल्लेख गर्दै तेह्रथुमको गाउँबाट निस्किएको आफ्नो यात्रा प्रहरी महानिरीक्षकसम्म पुगेकाले सकल दर्जाको हितको खातिर काम गर्ने बताए । उनले अपराध अनुसन्धानमा गहन चुनौती रहेको बताए ।
उनले एआई, साइबर, क्रिप्टो लगायत ट्रान्सनेशल अपराध नियन्त्रण गर्न हाम्रो क्षमता विस्तार गर्नुपर्ने दायित्व रहेको उल्लेख गरे । महानिरिक्षक खापुङले प्रविधि र साधन स्रोतले सम्पन्न प्रहरी बनाउने समय आएको बताए ।
