नेपाली कांग्रेसका नेता मीनेन्द्र रिजालले प्रतिनिधि सभाको निर्वाचन सम्पन्न भएपछि संविधान फेरि पूर्ण रूपमा क्रियाशील हुने बताएका छन्। आइतबार विहान राष्ट्रपति रामचन्द्र पौडेलको अपिल सेयर गर्दै सामाजिक सञ्जाल फेसबुकमा उनले राष्ट्रपतिको निर्णयबाट मुलुकले त्राण पाएको उल्लेख गरेका छन् ।
उनले प्रतिनिधि सभाको निर्वाचन घोषित मितिमा सुनिस्चित गर्न सहयोग पुर्याउनु हामी सबैको कर्तव्य भएको पनि बताएका छन् । नेता डा रिजालले निर्वाचन सम्पन्न भए सँगै चार पुस्ताको संघर्षबाट निर्माण भएको संविधान फेरि पुर्णरुपमा क्रियाशिल हुने उल्लेख गरेका छन् ।
नवनियुक्त अन्तरिम प्रधानमन्त्री सुशीला कार्कीको सिफारिसमा राष्ट्रपति रामचन्द्र पौडेलले शुक्रबार राति संसद् विघटन गर्दै फागुन २१ गतेका लागि प्रतिनिधि सभा निर्वाचन घोषणा गरेका छन्। प्रमुख राजनीतिक दलहरूले यसलाई असंवैधानिक भन्दै संविधानप्रति चिन्ता प्रकट गरिरहेका छन्।
तर तिनैमध्ये एक कांग्रेसका नेता रिजालले भने राष्ट्रपतिको निर्णयले मुलुकले त्राण पाएको बताउँदै अब चुनाव गराउन सहयोग गर्नुपर्ने धारणा राखेका हुन्।
उनले फेसबुकमा लेखेका छन् –‘राष्ट्रपतिको निर्णयबाट मुलुकले त्राण पाएको छ। प्रतिनिधि सभाको निर्वाचन घोषित मितिमा सुनिस्चित गर्न सहयोग पुर्याउनु हामी सबैको कर्तव्य हो। निर्वाचन सम्पन्न भए सँगै चार पुस्ताको संघर्षबाट निर्माण भएको संविधान फेरि पुर्णरुपमा क्रियाशिल हुनेछ।’
