नेपाली कांग्रेसले सरकारले दण्डहीनतालाई प्रोत्साहन गर्न लागेको भन्दै त्यसो नगर्न सरकारलाई सचेत गराएको छ । मंगलबार एक विज्ञप्तिमार्फत कांग्रेसले जेनजी आन्दोलनका पीडितलाई आतंकित गर्ने र सप्रमाण भेटिएका अपराधीलाई उन्मुक्ति दिँदै जाने सरकारको नीति भए कदापि स्वीकार्य नहुने स्पष्ट पारेको छ ।
कांग्रेसले ुजेन–जीुको आन्दोलनमा २४ गते अपराधिक समूह प्रवेश गरी हिंसा मच्चाएको दाबी गरेको छ । ‘भाद्र २३ गते जेन–जी पुस्ताले आह्वान गरेको शान्तिपूर्ण प्रदर्शनको आवरणमा आफ्नो कुत्सित मनसाय पूरा गर्ने विभिन्न अपराधिक समूहहरूले २४ गते बिहानैदेखि अकल्पनीय ढंगको आतंक सिर्जना गर्ने राष्ट्रव्यापी हिंसा, तोडफोड, लुटपाट र आगजनीका घटनाहरू घटाउन थाले, जसबाट हरेक क्षेत्रका निजी तथा सार्वजनिक संरचनाहरू तोडफोड, आगजनी र लुटपाट गरी ध्वस्त बनाइए, नेपाली कांग्रेसका मुख्य सचिव कृष्णप्रसाद पौडेलले जारी गरेको विज्ञप्तिमा उल्लेख छ ।
सरकारका तर्फबाट घटनाको छानबिन आयोग बन्नु सकारात्मक भए पनि आयोगलाई देखाएर दण्डहीनता सुरु गर्न लागेको कांग्रेसको आरोप छ ।
