अन्तरिम सरकारले विघटित प्रतिनिधिसभामा प्रतिनिधित्व गर्ने शीर्ष नेताहरूसंग छलफलमा बस्न नमानेपछि राष्ट्रपति रामचन्द्र पौडेलले प्रधानमन्त्री सुशीला कार्की, मन्त्रीहरू र विघटित प्रतिनिधिसभामा प्रतिनिधित्व गर्ने दोश्रो तहका नेताहरुसंग छलफल गर्नेभएका छन् । शुक्रबार अपराह्न ४ बजे राष्ट्रपति पौडेलले सरकार र सबै राजनीतिक दलका दोश्रो तहका नेताहरूसँग निर्वाचनबारे छलफल गर्न लागेको स्रोतले जानकारी दिएको छ। छलफल शीतलनिवासमै हुनेछ।
निर्वाचन कार्यतालिका सार्वजनिक भइसक्दा पनि सरकारले संवाद अगाडि नबढाएको भनेर दलहरूले प्रश्न उठाइरहेका छन्। चुनाव फागुन २१ गते तय छ। बिहीबार नै अन्तरिम सरकारकी प्रधामन्त्री प्रधानमन्त्री कार्की अर्थमन्त्री रामेश्वर खनाल र संचारमन्त्री जगदिश खरेल राष्ट्रपति पौडेललाई भेट्न शीतलनिवास पुगेका थिए। भेटमा राष्ट्रपति पौडेलले पनि निर्वाचनबारे चासो राख्दै सबै राजनीतिक दलहरूसँग संवाद र पहल गर्नुपर्ने बताएका थिए ।
अन्तरिम प्रधानमन्त्री कार्कीले निर्वाचनको वातावरण बनाउन दलहरूसँग संवादको पहल गरिदिन राष्ट्रपति पौडेललाई अनुरोध गरेकी थिइन्। सोही अनुसार राष्ट्रपति पौडेलले शुक्रबार बस्नेगरी सरकार र विघटित प्रतिनिधि सभामा रहेका सबै दलहरूलाई छलफलमा बोलाएको स्रोतले जनाएको छ। तर अन्तरिम प्रधानमन्त्री कार्कीले अहिले नै शीर्ष नेताहरूसंग छलफलमा बस्दा असहज हुने भन्दै दोश्रो तहका नेताहरूबाट छलफल थालिदिन आग्रह गरेकी थिइन् ।
