नेकपा एमालेका पोलिट्व्यूरो सदस्य महेश बस्नेतले फागुन २१ गतेको प्रतिनिधिसभा चुनावको तयारीका लागि राष्ट्रपति रामचन्द्र पौडेलले सर्वदलिय बैठक आह्वान गरेर संविधानको आत्मा जोगाउने प्रयास गरेको बताएका छन् । राष्ट्रपति पौडेलले आज दिउँसो ४ बजेका लागि अन्तरिम प्रधानमन्त्री सुशीला कार्कीसहित प्रमुख दलका नेताहरूलाई छलफलमा बोलाएका छन् ।
बस्नेतले तर राष्ट्रपति पौडेलको यो पहललाई असफल बनाउन खोज्नेहरू देशलाई फेरि अस्थिरतामा धकेल्न खोजिरहेका उल्लेख गरेका छन् । नेता बस्नेतले अन्तरिम प्रधानमन्त्री सुशीला कार्कीले निर्वाचन आयोगको तयारीलाई मुखौटा बनाएर राजनीतिक संवाद टार्ने कोसिस गरिरहेको बताएका छन् ।
उनले सामाजिक सञ्जालमा लेखेका छन् –‘आगामी फागुन २१ गतेको निर्वाचनको मिति सार्वजनिक भइसकेको छ, तर सरकार अझै संवाद र सहमतिको बाटोबाट टाढा छ।
यही पृष्ठभूमिमा राष्ट्रपति रामचन्द्र पौडेलले आज दिउँसो ४ बजेका लागि प्रधानमन्त्री सुशीला कार्कीसहित प्रमुख दलका नेताहरूलाई छलफलमा बोलाउनु भएको छ।’ बस्नेतले संवादबाट होइन, अदूरदर्शी अहंकारबाट सरकार चलाउने प्रवृत्तिको अन्त्य गर्न जरुरी रहेको स्पष्ट पारेका छन् ।
