कैलालीमा गएराती एक युवकको घाँटी रेटेर बीभत्स हत्या गरिएको छ । घोडाघोडी नगरपालिका–८ मा गएराति २८ वर्षीय केशरसिंह बुढाको हत्या गरिएको हो । हत्या आरोपमा सोही वडाका १८ वर्षीय बलबहादुर बिक र १९ वर्षीय गङ्गा बुढा क्षेत्रीलाई प्रहरीले पक्राउ गरेको छ ।
दुबै जनाले बुढाको घाँटी रेटेर टाउको छुट्याई टाउको बोकेर आफैं इलाका प्रहरी कार्यालय सुखड मातहतको प्रतिखेत प्रहरी चौकीमा पुगेका थिए । बुढाको टाउको बिनाको शरीर घटनास्थल मै छ।
इलाका प्रहरी कार्यालय सुखडले जनाए अनुसार हत्या भएका बुढा सुर्खेतको चौकुने गाउँपालिका–३ का हुन् । हत्यामा संलग्न दुई जनाले राति नै प्रहरीमा आएका थिए ।
प्रहरीका अनुसार, मृतक र हत्यामा संलग्न दुई जना स्थानीय खाजा पसलमा बसेर मदिरा सेवन गरिरहेका थिए । सोही क्रममा विवाद भएपछि उनीहरुले धारिलो हतियार प्रहार गरेर बुढाको घाँटी रेटेर हत्या गरेका थिए ।
सुर्खेतबाट मृतकका आफन्त आइरहेकाले अहिले शव घटनास्थलबाट उठाइएको छैन ।
