हमासद्वारा बन्धक बनाइएका बन्दीहरूमध्ये नेपालका विपिन जोशीसहित २२ बन्धकहरू जीवितै रहेको सार्वजनिक भएको छ । अमेरिकाको वासिङ्गटन पोस्टले विपिनसहित २२ बन्दीहरू जीवितै रहेको सार्वजनिक गरेको हो ।
२२ जना बन्धकको नाम सूची सार्वजनिक गर्दै पोष्टको समाचारमा उल्लेख छ, “उनी गाजामा जीवित रहेको विश्वास गरिने एक मात्र गैर–इजरायली बन्धक हुन् ।” पछिल्लो केही दिन यता विपिनको अवस्था अज्ञात रहेको समाचारहरु सार्वजनिक हुन थालेपछि उनको विषयमा थप अन्योल बढेको थियो । जोशी जिवितै रहेको इजरायलले पनि विश्वास गरेको छ ।
हमासले भने अहिलेसम्म जीवित बन्दीहरूको नामावली दिइसकेको छैन । केही दिन अघि विपिन अपहरणमा परेपछि हमासको कब्जामा रहेको अवस्थाको उनको पुरानो भिडियो सार्वजनिक भएको थियो ।हाल गाजामा ४८ जना बन्धकहरू छन्, जसमा अघिल्लो युद्धमा मारिएका एक सैनिकको शव पनि समावेश छ ।
इजरायलले कम्तीमा २५ जना बन्धकहरू ७ अक्टोबर २०२३ मा मारिएको वा बन्दी अवस्थामा मृत्यु भएको पत्ता लगाएको छ । हमास र ईजरायलबिच शुक्रबार युद्धविराम सुरु भएपछि बाँकी बन्धकहरूलाई ७२ घण्टाभित्र फिर्ता गरिने अपेक्षा गरिएको छ । यसको बदलामा इजरायलले करिब २,००० जना प्यालेस्टिनी कैदीहरूलाई रिहा गर्नेछ ।
