भारत भ्रमणमा रहेको नेपाली राष्ट्रिय महिला फुटबल टिमले ईरानसँग पहिलो मैत्रीपूर्ण प्रतिस्पर्धा गर्दै छ । त्रिदेशीय मैत्रीपूर्ण महिला फुटबल प्रतियोगिता अन्तरगत आज नेपाल र इरानबीच प्रतिस्पर्धा हुने भएको हो । भारतको सिलोङस्थित जवाहरलाल नेहरु रंगशालामामा आज ईरानसँग साँझ सवा ६ बजे सुरु हुने यो खेल भ्रमणमध्येको नेपालको पहिलो खेल हो ।
ईरानले भने आफ्नो दोस्रो खेलस्वरुप नेपालसँग खेल्दैछ । उद्घाटन खेलमा भारतलाई २–० गोलले हराउँदै ३ अंक जोडेको फिफा वरियताको ७० औ स्थानमा रहेको ईरानलाई पाखा लगाउँदै नेपालले पहिलो खेलमै नतिजा आफ्नो पक्षमा पार्ने दाउमा नेपाल रहँदा ईरान भने दोस्रो जीतको खोजीमा छ । नेपाल भने वरियताको ८९ स्थानमा छ ।
ईरानपछि नेपालले अर्को खेल फिफा वरियतामा आफुभन्दा २६ स्थान माथि रहेको घरेलु टोली भारतसँग सोमबार खेल्नेछ । प्रत्येक टिमले दुई खेल खेल्ने प्रतियोगिताको शीर्ष स्थानमा रहने टोलीले उपाधि जित्ने छ । यो प्रतियोगितापछि नेपालले पुनः भारतसँग सिक्किममा कात्तिक १३ गते अन्तर्राष्ट्रिय मैत्रीपूर्ण खेल खेल्नेछ । फिफा विन्डोभित्र नपरे पनि यो खेललाई अन्तर्राष्ट्रिय मान्यता दिइने बताइएको छ ।
सावित्रा भण्डारीको कप्तानीमा रहेको नेपाली टोलीमा अञ्जिला तुम्बापो सुब्बा, अञ्जना रानामगर, उषा नाथ, निशा थोकर, समीक्षा घिमिरे, पुजा राना, सजनी थोकर, मनमाया दमाई, प्रतीक्षा चौधरी, हिराकुमारी भुजेल, विमला विक, रेनुका नगरकोटे, प्रीति राई, दीपा शाही, सरु लिम्बू, सरस्वती हमाल, अनिता बस्नेत, सवीता रानामगर, मीना देउवा, रश्मिकुमारी घिसिङ, पूर्णिमा राई र रेखा पौडेल छन् ।
