ठूलो दलको हैसियतमा प्रदेश प्रमुख सुमित्रा देवी भण्डारीले नेकपा एमालेका सरोजकुमार यादवलाई नयाँ मुख्यमन्त्री नियुक्त गरेपछि यो घटनालाई निवर्तमान मुख्यमन्त्री जितेन्द्र सोनलले मधेश प्रदेशको अस्मिता समाप्त पार्ने खेल भएको टिप्पणी गरेका छन् ।
प्रमुख भण्डारी अस्वस्थ भएको भन्दै बिहानै जनकपुरबाट काठमाडौं प्रस्थान गरेकी प्रदेश प्रमुख भण्डारीलार्ई स्वास्थ्य लाभको कामना गर्दै बिदाइ गरेका सोनलले पछिल्लो राजनीतिक घटनाक्रमबारे यस्तो टिप्पणी गरेका हुन् ।
हिजो आइतबारको मितिमा यादवलाई प्रदेश प्रमुख सुमित्रा भण्डारीले संविधानको धारा १६८ को उपधारा ३ बमोजिम आज बिहानमात्रै बर्दिबासको पानस होटेलमा शपथ गराएकी थिईन् ।
प्रदेश सभामा विश्वासको मत प्राप्त नहुनेभएपछि यसअघिका मुख्यमन्त्री जितेन्द्र सोनलले पदबाट राजिनामा दिएका थिए ।
हिजोमात्रै नेपाली कांग्रेससहित सात दलले मधेस प्रदेश प्रमुख सुमित्रा सुवेदी भण्डारीलाई नेपालको संविधानको धारा १६८ को उपधारा २ बमोजिम सरकार गठनका लागि आह्वान गर्न आग्रह गरेका थिए ।
प्रदेश प्रमुख कार्यालयमा आज पुगेर नयाँ सरकार गठनका लागि आग्रह गर्नेहरुमा कांग्रेस, जसपा नेपाल, जनमत, नेपाल कम्युनिष्ट पार्टी (माओवादी केन्द्र), लोसपा, नेकपा एकीकृत समाजवादी र नागरिक उन्मुक्तिका दलका नेता तथा सांसदहरु थिए ।
तर नयाँ सरकारको गठन प्रक्रियाबारे कसैले चाल नै नपाउने गरी नयाँ मुख्यमन्त्री नियुक्त नहुञ्जे्लसम्मका लागि मौजुदा मन्त्रीपरिषद्लाई नै कार्यभार सम्हाल्ने जिम्मेवारी दिएकी प्रदेश प्रमुख भण्डारीले छापामार शैलीमा मुख्यमन्त्री नियुक्त गरीन् ।
