गोरखा । शरद ऋतुका लागि मनास्लु हिमालको आरोहण सुरु भएको छ । यस याममा आरोहणका लागि अनुमति लिएका विभिन्न देशका ४६६ आरोहीले गत मङ्गलबारदेखि आरोहण थालेका हुन् ।
३९ समूहमा आबद्ध ३४२ पुरुष र १२४ महिला आरोही आधार शिविरबाट शिखरतर्फ प्रस्थान गरेका छन् । आरोहणअघि आधार शिविरमा लामा गुरुद्वारा पूजा गरिएपछि आरोहणको साइत गरिएको आरोहीका सहयोगी विसबहादुर गुरुङले जानकारी दिए ।
उनका अनुसार आरोहीहरूले अबको एकदेखि तीन साताभित्र मनास्लुको शिखर आरोहण सम्पन्न गर्ने अपेक्षा गरिएको छ ।
पर्यटन विभागका अनुसार यस याममा मनास्लु आरोहणका लागि अनुमति लिएका आरोहीबाट सरकारले रु २१ करोड २४ लाख ४८ हजार राजस्व सङ्कलन गरेको छ । आरोहीको सङ्ख्या र सङ्कलित राजस्व दुवै हालसम्मकै उच्च भएको विभागले जनाएको छ ।
गोरखाको चुमनुब्री गाउँपालिका–१ सामागाउँमा अवस्थित मनास्लु हिमालको आरोहण सन् १९५६ मे ९ देखि सुरु भएको हो । समुद्री सतहबाट आठ हजार १६३ मिटर उचाइमा रहेको मनास्लु विश्वको आठौँ अग्लो हिमाल हो ।
