नेपाली कांग्रेसका केन्द्रीय सदस्य बलबहादुर केसीले १४ औं महाधिवेशनबाट निर्वाचित पार्टीका सबै निकाय विघटन गर्न माग गरेका छन् । जारी केन्द्रीय समितिको बैठकमा आफ्नो धारणा राख्दै नेता केसीले वर्तमान केन्द्रीय कार्यसमिति बैठकले सहमतिबाट महाधिवेशनको विषयमा देखिएको विवादको समाधान निकाल्न नसके केन्द्रदेखि वडासम्मका सबै समिति विघटन गर्नुपर्ने बताए । नेता केसीले निकास निकाल्न नसक्ने समितिको काम नभएको बताए ।
केसीले पार्टीको सङ्कट समाधानका लागि महाधिवेशन अन्तिम विकल्प भएको बताए । उनले वर्तमान कार्यसमितिले निकास दिन नसके निर्वाचन गराउने नैतिक अधिकारसमेत गुमाउने उल्लेख गर्दै आफ्नो प्रस्तावलाई पार्टीको पुनर्जीवनका लागि आवश्यक ‘थेरापी’ भएको बताए । केसीले पार्टीभित्रको गुटगत राजनीति चरम अवस्थामा पुगेको र सामान्य प्रक्रियाबाट समाधान खोज्ने अवस्था नरहेको जिकिर गरे । अबको महाधिवेशनलाई शक्ति प्रदर्शनको थलो नबनाएर पार्टीको भविष्यबारे गम्भीर चिन्तन गर्ने चौतारी बनाउनुपर्ने प्रस्ताव केसीको छ ।
केसीले संस्थापन र इतर दुवै समूहका नेतृत्वमा रहेका नेताहरूको आलोचना गरे । इतर समूहका नेताहरू डा शेखर कोइराला र गगन थापालाई एक हुन नसके संस्थापन पक्षसँग लड्ने तागत नै नहुने बताए । देउवाले पार्टीलाई सहमतिको आधारमा नभई गुटगत स्वार्थमा चलाएको आरोप केसीले लगाए । पार्टीभित्र एकताको वातावरण बनाउन महाधिवेशनअघि अनुशासनको कारबाहीमा परेका सबै नेता–कार्यकर्तालाई आममाफी दिनुपर्ने केसीको माग छ ।
