नेपाली कांग्रेस गण्डकी प्रदेशका सहमहामन्त्री रमेशकुमार पाण्डेले पार्टीभित्र बढ्दो गुटबन्दी,व्यक्तिगत मोह र कार्यकर्ताबीचको खिचातानीप्रति कडा आक्रोश व्यक्त गरेका छन्। उनले सामाजिक सञ्जालमार्फत हालका पार्टी भित्र देखिएका घटनाले कांग्रेसको संगठन नै कमजोर बन्दै गएको उल्लेख गरेका छन्।
पाण्डेले शेरबहादुर देउवा र गगन थापासँग नजिक मानिएका युवाहरू नै कठिन अवस्थामा नेताको सुरक्षामा उभिन नसक्नु पार्टीभित्रको असुस्थता र कमजोर संरचनाको प्रष्ट संकेत हो। उनले लेखेका छन् – ‘शेरबहादुर दाइसँग नजिक भएका युवा शेरबहादुरलाई जोगाउन गएनन्, न गगनसँग नजिक भएकाले गगनको घर जोगाउन सके। अहिलेचाहिँ दुबै पक्षका युवाहरू आफूलाई सबैभन्दा क्रान्तिकारी देखाउन दौडिरहेका छन्।’
पाण्डेले नेविसंघ र तरुण दलका गतिविधि कमजोर हुँदै गएको उल्लेख गर्दै यी संगठनहरू पहिलेदेखि जस्तै सक्रिय हुन्थे भने आज पार्टीका नेता र कार्यकर्ता असुरक्षित महसुस गर्नुपर्ने स्थिति नै नआउने बताए । पार्टीभित्रकै साथीहरूको विरुद्ध लड्न तत्पर हुने तर विपक्षीसँग बोल्न डराउने प्रवृत्तिलाई उनले ‘कायरता’को संज्ञा दिए।
शेरबहादुर देउवाको दशकौँ लामो योगदानप्रति सम्मान व्यक्त गर्दै उनले अब युवाहरूको नेतृत्वले कांग्रेसलाई अघि बढाउनुपर्ने सुझाव पनि दिए। गाली–गलौज, आरोप–प्रत्यारोप र गुटगत भेला बन्द गर्ने समय आएको बताउँदै पाण्डेले गुण–दोषका आधारमा नेता छनोट गर्ने संस्कार सुरु गरेमात्र कांग्रेस सही लक्ष्यतर्फ बढ्न सक्छ स्पष्ट पारे ।
