नेपाली काँग्रेस जस्तो नेपालको एक जिम्मेवार लोकतान्त्रिक राजनीतिक पार्टीे निर्माणका क्रममा थुप्रै मानिसले सहादत प्राप्त गरेका छन् । लाखौँ मानिसको पवित्र भावना, रगत र पसिनाले सिन्चिएको यो पार्टीलाई विभिन्न कालखण्डमा केही देखावटी काँग्रेसले आफ्नो बपौती भने पक्कै बनाउन कोशिश गरका हुन् । त्यलाई चिर्दै यहाँसम्म आइपुग्दा आजका दिनमा पनि नक्कली क्रान्तिकारीको खोल ओढेर सज्जन काँग्रेसी जनालाई झुक्याउने दाउमा कोही लागेको हो भने हामीले त्यस्तो महत्त्वाकांक्षा पूरा गर्न दिनुहुँदैन । बिपी कोइरालाले भनें झैं लामो वा छोटै समयको सत्ता अभ्यासले पनि भुइँफुट्टा जन्माउन सक्छ, सचेत रहनुपर्छ ।
पार्टीको जिम्मेवार र जवाफदेही ओहदामा बसेर पार्टीे निर्माणको गहनतम जिम्मेवारी वहन गर्नुपर्नेमा राजनीतिक शक्तिको भरपूर प्रयोग गर्दै भागबण्डाको निम्छरो प्रवृत्तिको भालू चढेर कार्यकर्तालाई अनुचित दवाव र प्रभावमा पार्ने काममा चुल्लुम्म डुबेर पनि पानी माथिको ओभानो बन्ने चलाखी कसैले नगर्दा राम्रो । यति ठूलो इतिहास र बलिदानीबाट बनेको एउटा निश्चित उद्देश्यका साथ प्रतिष्ठित नेपाली काँग्रेस पार्टीलाई जम्माजम्मी आफ्नो स्वार्थ सिद्धिको साधन बनाउन खोज्ने र आफूलाई निकै अब्बल हूं भन्दै निजी व्यक्तित्त्व बनाउने लोभमा पार्टीको सम्पूर्ण व्यक्तित्त्वको चिरहरण गर्ने कामको हामी बिना सर्त विरोध गर्दछौं ।
लोकतन्त्रको मजबुती त्यहाँका लोकतान्त्रिक संस्थाहरू बलियो भए मात्र सम्भव हुन्छ । लोकतन्त्रलाई व्यवहारमा उतार्ने राजनितिक पार्टीे वा संस्था त झन् बलियो र भरोसायोग्य हुनुपर्दछ । सिद्धान्तनिष्ठ मजबुत पार्टीे निर्माणको महत्वपूर्ण जिम्मेवारी पक्कै पनि त्यसलाई सञ्चालन गर्ने नेतृत्त्ववर्गसँग हुन्छ नै । तर त्यो नेतृत्त्व बेइमान र आफ्नो मात्र स्वार्थमा केन्द्रित रह्यो भने त्यसबाट जनताले पाउने भनेको धोखा मात्रै हो । नेपाली काँग्रेसको सन्दर्भमा हाल पार्टीको जिम्मेवार पदमा रहेका तर घोर गैरजिम्मेवार भूमिका निर्वाह गरिरहेका केही व्यक्तिका शक्ति हत्याउने उग्र आकांक्षाले सिङ्गो पार्टीलाई कमजोर बनाएको छ ।
पार्टीे दुब्लाउने तर आफू मोटाउने अभियान नै सञ्चालन गरेका नक्कली तर आकर्षक देखिने क्रान्तिकारीले पार्टीको सिद्धान्त, मूल्य र मान्यतामा ठाडो प्रहार गरिरहेको अवस्था प्रति चनाखो हुन पार्टीका आम साथीहरू र शुभेच्छुकहरूमा हार्दिक आग्रह गर्दछु । साथै देशभरका इमानदार र निष्ठावान कार्यकर्ताले एकताबद्ध भई त्यस्ता तत्त्वलाई निस्तेज गरी पार्टीे संस्थालाई सर्वोपरी राख्दै पार्टीलाई एकढिक्का बनाएर जनताको विश्वास र भरोसाको केन्द्र बनाउने काममा जुट्न अपिल गर्दछु ।
नेपाली कांग्रेसका केन्द्रीय सदस्य तथा बागमति प्रदेशसभा सदस्य काफ्लेको फेसबुकबाट
