नेकपा एमालेका वरिष्ठ उपाध्यक्ष इश्वर पोखरेलले आज एमालेको ११ औं महाधिवेशनमा अध्यक्षमा उम्मेदवार बन्ने संकेत गरेर वक्तव्य जारी गर्ने भएका छन् । एमालेको आसन्न ११औं महाधिवेशनअन्तर्गत मंगलबारबाट प्रतिनिधि छनोटको कार्यसूची अघि बढेको छ।
प्रतिनिधि छनोटको पूर्वसन्ध्या आम कार्यकर्ता पंक्तिलाई आह्वान गर्ने पोखरेलले वक्तव्य जारी गर्न लागेका हुन् । पोखरेलसहित केही नेताले भने अर्को साता मात्र उम्मेदवारी घोषणा गर्ने कार्यक्रम तय भएको उनी निकट नेताहरूले जनाएको छ । पोखरेलले पार्टी सचिवालय बैठकमै आफू पार्टीको नेतृत्व गर्न तयार रहेको सन्देश दिइसकेका छन् ।
पोखरेल निकट एमाले नेताले भने– ‘पार्टी सचिवालय बैठकमै आफू पार्टीको नेतृत्व गर्न तयार रहेको सन्देश दिइसक्नुभएको छ । प्रतिनिधि छनोटको पूर्वसन्ध्यामा वरिष्ठ उपाध्यक्ष पोखरेलले त्यही सन्देशका साथ कार्यकर्ता पंक्तिलाई आह्वान गर्न लाग्नुभएको हो।’
