मधेस प्रदेशमा नयाँ सरकार गठनको गृहकार्यमा जुटेका सात दलले आज नयाँ मुख्यमन्त्रीको नाम टुंग्याउदैछन् । मधेस प्रदेश सभामा प्रतिनिधित्व गर्ने सातदल नयाँ सरकार गठनको लागि हिजो छलपलमा बसेपनि निष्कर्षमा पुग्न नसक्दा आज फेरी बैठक बस्ने भएका हुन् ।
ती दलहरुले नयाँ मुख्यमन्त्रीको नाममा आफुहरुबीच कुनै विवाद नरहेको दाबी गरेका छन् । यद्यपी कांग्रेस र लोसपाले मुख्यमन्त्रीको दाबी नछोडेपछि बैठक बिनानिष्कर्ष टुंगिएको बताईएको छ । अबको मुख्यमन्त्रीमा यसअघिका मुख्यमन्त्री लोसपा नेता जितेन्द्र सोनल र कांग्रेसका कृष्ण यादवको दाबी रहेको बताईएको छ ।
कांग्रेसले मधेश प्रदेशमा सबै दलको नेतृत्वमा सरकार बनिसकेकाले कांग्रेसको पालो भन्दै मुख्यमन्त्री दिनुपर्ने अडान राखेको छ । लोसपाले भने जितेन्द्र सोनलको सरकार धेरै दिन नचलेको र अपमानपूर्ण हट्नु परेकोले एक पटक फेरि लोसपालाई अवसर दिनुपर्ने भन्दै मुख्यमन्त्रीको दाबी गरेको छ ।
मधेश प्रदेशमा मुख्यमन्त्रीका लागि दाबी पेश गर्ने समय आज बेलुका ५ बजेसम्म रहेको छ ।
