जापानमा शक्तिशाली भुकम्प गएको छ । जापानको उत्तर–पूर्वी क्षेत्रमा स्थानीय समयअनुसार गएराति सवा ११ बजे ७ दशमलव ५ म्याग्निच्यूडको शक्तिशाली भूकम्प गएको हो ।
समुद्र किनारबाट केही टाढा उत्पन्न भएको भूकम्पपछि १० फिटसम्मको सुनामी आउन सक्ने चेतावनी दिएपनि जापान मौसम एजेन्सीले पछि सतर्कता अपनाउन भनिएको छ । भूकम्पको केन्द्र आओमोरी प्रिफेक्चरबाट झन्डै ८० किलोमिटर टाढा समुद्रभित्र ५४ किलोमिटर गहिराइमा रहेको जनाईएको छ ।
अहिलेसम्म ठूलो मानवीय वा भौतिक क्षति नभए पनि केही मानिस घाइते भएका छन् भने पूर्वी जापान रेलवेले केही रेलसेवाहरू स्थगित गरिएको छ । यो क्षेत्र सन् २०११ को ९ म्याग्निच्यूडको विनाशकारी भूकम्पबाट पनि प्रभावित ठाउँ हो । त्यो बेला भूकम्प र सुनामीले झन्डै २० हजारको ज्यान गएको थियो ।
गयराति आएको भुकम्पपछि सुनामीको चेतावनीसँगै झन्डै ९० हजार मानिसलाई सुरक्षित ठाउँमा सारिएको छ । होक्काइदो, आओमोरी र इवाते प्रिफेक्चरका लागि जारी चेतावनीपछि २० सेन्टीमिटरदेखि ७० सेन्टीमिटर उचाइका छालहरू विभिन्न बन्दरगाहहरूमा देखिएको अन्तराष्ट्रिय सञ्चारमाध्यमहरुले जनाएका छन् । छालको उचाइ र क्षतिको जोखिम पहिलेको अनुमानभन्दा कम देखिएको जापानी मौसम एजेन्सीले जनाएको छ ।
जापान विश्वकै सबैभन्दा धेरै भूकम्प जाने देशहरूमध्ये एक हो जहाँ हरेक पाँच मिनेटमा एउटा भूकम्प मापन हुने गर्छ ।
