काठमाडौमा जारी साफ महिला क्लब च्याम्पियनसिपको फाईनल खेल आज हुँदैछ । च्याम्पियनसिपको उपाधिका लागि नेपालको विभागीय टोली एपीएफ र भारतको इस्ट बंगाल एफसी भिड्दैछन् । खेल काठमाण्डौको त्रिपुरेश्वरमा रहेको दशरथ रङ्गशालामा बेलुका ५ बजे शुरु हुनेछ ।
राउन्ड रोबिनको एक खेलअघि नै फाईनलमा स्थान पक्का गरेका दुवै टोली आँज साँझ पाँच बजे त्रिपुरेश्वस्थित दशरथ रंगशालामा आमने सामने हुने भएका हुन् । राउन्ड रोबिनको खेलमा इस्ट बंगाल शीर्ष र एपीएफ दोस्रो स्थानमा छन् । फाइनलअघि राउन्ड रोबिनको अन्तिम खेलमा दुवै टोलीले गोलरहित बराबरीको नतिजा निकालेका थिए ।
राष्ट्रिय टोलीका अधिकांश खेलाडीले भरिएको एपीएफले घरेलु मैदानमा बलियो र चिरपरिचत इस्ट बंगालको चुनौती पन्छाउँदै उपाधि चुम्ने लक्ष्यमा छ । एपीएफसँग आफ्ना स्टार फरवार्ड तथा राष्ट्रिय महिला फुटबल टोलीकी कप्तान सावित्रा भण्डारी (साम्बा), मिडफिल्डर प्रिति राई र गोलरक्षक एञ्जिला तुम्बाप्पो सुब्बाको अनुपस्थितीलाई पुरा गर्ने चुनौती छ । त्यस्तै ५ विदेशी खेलाडीसहित नेपाल आएको इस्ट बंगाल एपीएफका ती स्टार नभएको मौका सदुपयोगको दाउमा छ ।
च्याम्पियनसिपमा अपराजित नेपालको एपीएफले बंगलादेशको नसरिन स्पोर्टस् एकेडेमी , पाकिस्तानको कराँची एफसीमाथि जित निकाल्दा भुटानको ट्रान्सपोर्ट युनाइटेड महिला एफसी र इस्ट बंगालसँग गोलरहित बराबरी खेलेको थियो । दक्षिण एशियाली फुटबल महासंघ (साफ) ले पहिलो पटक आयोजना गरेको च्याम्पियनसिपमा नेपाल, भारत, भुटान, बङ्गलादेश र पाकिस्तान गरी ५ सदस्य देशका लिग विजेता टोली सहभागी छन् ।
साफ महिला क्लब च्याम्पियनसिपको पहिलो संस्करण गएको मंसिर १९ गतेदेखि काठमाण्डौमा शुरू भएको हो । उपाधि जित्ने टोलीले १० हजार र उपविजेताले ५ हजार अमेरिकी डलर प्राप्त गर्नेछ । बाँकी तीन टोलीले समान २ हजार अमेरिकी डलर पाउनेछन् ।
