नेपाली कांग्रेसका ६६ जना सांसदहरूले प्रतिनिधि सभा पुनर्स्थापनाका पक्षमा हस्ताक्षर गरेका छन् । कांग्रेस संसदीय दलको कार्यालय स्रोतका अनुसार आइतबार दिउँसोसम्म ६६ जना सांसदहरूले हस्ताक्षर गरेका हुन् ।
निवर्तमान प्रमुख सचेतक श्यामकुमार घिमिरे र सचेतक सुशीला थिङसहित सांसदहरूले प्रतिनिधि सभा पुनर्स्थापनाका पक्षमा सर्वोच्च अदालतमा रिट दिएका छन्। सोही रिटमा पक्ष कायम गर्न कांग्रेसका थप सांसदहरूले पनि हस्ताक्षर गरेका छन्।
तर प्रतिनिधि सभा पुनर्स्थापनाका पक्षमा कांग्रेसका सभापति शेरबहादुर देउवासहित कार्यबाहक सभापति, महामन्त्रीद्धय डा शेखर कोइरालालगायत शीर्ष नेताहरूले हस्ताक्षर गरेका छैनन्।
कांग्रेसले पछिल्लो केन्द्रीय समिति बैठकबाट फागुन २१ को प्रतिनिधि सभा चुनावमा भाग लिने निर्णय गरेको थियो। त्यसअघि केन्द्रीय समिति बैठक चल्दै गर्दा पनि निवर्तमान प्रमुख सचेतक श्यामकुमार घिमिरेको अगुवाइमा प्रतिनिधि सभा पुनर्स्थापनाका लागि हस्ताक्षर संकलन गरिएको थियो।त्यसबेला ४५ जना सांसदहरूले हस्ताक्षर गरिसकेका थिए।
