आगामी माघ ११ गते हुने राष्ट्रियसभाको चुनावमा नेपाली कांग्रेस, नेकपा एमाले, नेपाली कम्युनिष्ट पार्टी (नेकपा) र मधेशवादी दलहरूका बीचमा गठबन्भन हुने भएको छ । उच्च स्रोतका अनुसार निर्वाचित हुने १८ सिटमा दलहरूका बीचमा भागबण्डा समेत भइसकेको बताइएको छ । जसअनुसार नेकपा कांग्रेसले ७ सिट, नेकपा एमालेले ६, नेकपाले ३ र उपेन्द्र यादवको जनता समाजवादीले १ र महन्थ नेतृत्वको लोकतान्त्रिक समाजवादी पार्टीले १ सिट पाउनेगरि सहमति भइसकेको छ ।
कुन प्रदेशबाट कुन दलले कुन कुन क्लस्टरमा उमेदवारी दिने भन्ने भने छलफल भइरहेको छ । नेकपा एमालेका अध्यक्ष केपी ओली र नेकपाका संयोजक पुष्पकमल दाहालका बीचमा संवाद नभइरहेको अवस्थामा दुवै नेताबीचमा समन्वय नेपाली कांग्रेसका सभापति शेरबहादुर देउवाले गरिरहेको बताइएको छ ।
राष्ट्रिय सभाको निर्वाचन आगामी माघ ११ गते हुँदैछ । निर्वाचन आयोगबाट स्वीकृत निर्वाचन कार्यक्रम अनुसार पुस १९ गते बिहान १० बजेदेखि ११ बजेसम्म मतदाता नामावली प्रकाशन हुनेछ । मतदाता नामावली उपरको दाबी विरोध तथा निवेदनररउजुरी माथि छानबिन गरी पुस २२ गते दिउँसो ३ बजेदेखि ४ बजेसम्म अन्तिम मतदाता नामावली प्रकाशन गरिनेछ । पुस २३ गते बिहान १० बजेदेखि दिउँसो ३ बजेसम्म उम्मेदवारको मनोनयन पत्र दर्ता गर्ने कार्यक्रम छ ।
पुस २४ गते विहान १० बजेदेखि दिउँसो ४ बजेसम्म उम्मेदवारको विरोधमा उजुरी दिने, पुस २७ गते उम्मेदवारले नाम फिर्ता चाहनलेलाई समय दिने, र उम्मेदवारको अन्तिम नामावली प्रकाशन गर्ने कार्यक्रम छ । पुस २८ गते उम्मेदवारले निर्वाचन चिन्ह सम्बन्धित निर्वाचन अधिकृतको कार्यालयबाट पाउनेछन् । माघ ११ गते बिहान ९ बजेदेखि दिउँसो ३ बजेसम्म सम्बन्धित मतदान केन्द्रमा मतदान हुनेछ ।
