आउँदो माघ ११ गते हुने राष्ट्रिय सभा निर्वाचनका लागि आज उम्मेदवारको मनोनयन दर्ता हुँदैछ । निर्वाचन आयोगको कार्यतालिका अनुसार आज बिहान १० देखि ३ बजेसम्म उम्मेदवार मनोनयन पत्र दर्ता कार्यक्रम रहेको हो । आयोगका अनुसार भोली बिहान १० देखि ४ बजेसम्म उम्मेदवारविरुद्ध उजुरी दिने पुस २७ गते बिहान १० देखि दिउँसो १ बजेसम्म उम्मेदवारको नाम फिर्ता लिने समय रहेको छ । २७ गते नै आयोगले अन्तिम नामावली प्रकाशित गर्नेछ ।

निर्वाचनबाट राष्ट्रिय सभाका लागि कोसी र लुम्बिनी प्रदेशबाट ३–३ जना, मधेस प्रदेशबाट ४ जना, बागमती, गण्डकी, कर्णाली र सुदूरपश्चिम प्रदेशबाट २–२ जना निर्वाचित हुनेछन् । बाँकी एक जना सरकारको सिफारिसमा राष्ट्रपतिबाट मनोनित हुनेछन् । आगामी फागुन २१ गते कार्यकाल सकिन लागेका राष्ट्रिय सभाका सदस्यमा एमालेका ८, मनोनित वामदेम गौतमसहित नेकपाका ९ र जसपाका २ जना छन् । उनीहरुको कार्यकाल सकिएपछि रिक्त हुने स्थानका लागि निर्वाचन हुन लागेको हो ।

राष्ट्रिय सभा निर्वाचनका लागि मुख्य दलहरुले भने सीटसंङख्यामा भागबण्डा को सहमति गरेका छन् ।मुख्य राजनीतिक दलहरु नेपाली कांग्रेस, नेकपा एमाले, नेपाली कम्युनिस्ट पार्टी र जनता समाजवादी पार्टीले गठबन्धन गरेर निर्वाचनमा जान लागेका हुन् । ४ दलबीच भएको सहमती अनुसार कांग्रेसले सात एमालेले सात,नेकपाले तीन र जसपाले एक सीटमा उम्मेदवारी दिनेछन् । निर्वाचनमा मतभारका दृष्टिले सबैभन्दा ठूलो कांग्रेसले आफुले ८ सीट पाउनेपर्ने अडान राखेपनि अन्तिममा सातमा सहमत बनेको थियो ।

माघ ११ गते हुने राष्ट्रिय सभा सदस्य निर्वाचनमा प्रदेश सभा र स्थानीय तहका प्रमुख÷उपप्रमुख, अध्यक्ष÷उपाध्यक्षले मत दिन व्यवस्था रहेको छ । अहिले राष्ट्रिय सभामा नेकपाको अध्यक्षसहित १७ जना, कांग्रेसका १६ जना, एमालेको उपाध्यक्षसहित १० जना, एकीकृत समाजवादीको ८, जसपा नेपालको ३, लोसपा र राष्ट्रिय जनमोर्चाको एक÷एक र राष्ट्रपतिबाट मनोनित ३ जना गरी ५९ सदस्य रहेका छन् ।