नेपाली कांग्रेसको आजदेखि सुरु हुने विशेष महाधिवेशनका लागि महाधिवेशन प्रतिनिधिको नाम दर्ता बिहान ८ बजेदेखि शुरु हुने भएको छ । दोस्रो विशेष महाधिवेशन व्यवस्थापन सचिवालय संयोजक मनोजमणि आचार्यका अनुसार कार्यक्रमस्थल भृकुटीमण्डप मूल गेट सँगैका स्टलहरूबाट नाम दर्ता गरिनेछ । प्रतिनिधीहरुलाई नाम दर्ता गर्न आउँदा परिचय खुल्ने कुनै कागजात, एकप्रति पासपोर्ट साइजको फोटो र दर्ता शुल्क एक हजार रुपैयाँ अनिवार्य गरिएको छ ।
महामन्त्रीद्वय गगनकुमार थापा र विश्वप्रकाश शर्माको आह्वानमा शुरु हुन लागेको पार्टीको विशेष महाधिवेशन उद्घाटनअघि बिहान ११ बजे र्याली आयोजना गरिएको छ । दिउँसो १ बजे भृकुटीमण्डपमा उद्घाटन समारोह शुरु हुनुअघि काठमाण्डौको सुन्धारा, रत्नपार्क, पद्मकन्या क्याम्पसचोक, शङ्करदेव क्याम्पस, कमलपोखरी र ललितपुरको कुपण्डोललगायतका क्षेत्रबाट जुलुस प्रदर्शन गर्न लागिएको हो ।विशेष महाधिवेशन उद्घाटनका लागि सभापति शेरबहादुर देउवालाई निम्तो गरिएपनि अस्विकार भएको छ ।
विशेष महाधिवेशनका लागि काठमाण्डौ उपत्यकाका विभिन्न सडकमा पार्टीका झण्डाले सिँगारिएका छन् । कांग्रेसभित्र संस्थापन पक्षको असहमतिका बीच हुन लागेको यो विशेष महाधिवेशनलाई चासोका साथ हेरिएको छ । महाधिवेशनमा नीति दस्तावेज प्रस्तुत गरिने भएपनि नयाँ नेतृत्व चयन हुने वा नहुने अन्यौल छ ।
