काठमाडौँ । आइसीसी महिला टी-२० विश्वकप ग्लोबल छनोट अन्तर्गत समूह चरणको तेस्रो खेलमा जिम्बाबेलाई पराजित गर्दै नेपालले प्रतियोगिताको सुपर-६ चरणमा पुग्ने सम्भावनालाई कायम राखेको छ।
लगातार दुई खेलमा पराजय बेहोरेको नेपाली महिला टोलीले तेस्रो प्रयासमा पहिलो जित हासिल गरेको हो। शनिबार सम्पन्न खेलमा नेपालले जिम्बाबेलाई ६ विकेटले हराउँदै महत्वपूर्ण अंक जोड्यो। यस हारसँगै जिम्बाबे भने समूह चरणमै अंकविहीन अवस्थामा प्रतियोगिताबाट बाहिरिएको छ।
यसअघि नेपाल पहिलो खेलमा थाइल्यान्डसँग ८ विकेटले तथा दोस्रो खेलमा नेदरल्यान्ड्ससँग २ रनको साँघुरो अन्तरले पराजित भएको थियो।
अब नेपालले समूह चरणको अन्तिम खेल सोमबार स्कटल्यान्डविरुद्ध खेल्नेछ। उक्त खेलमा जित निकाल्दै नेट रनरेटमा अग्रता बनाउन सके नेपाल सुपर–६ चरणमा प्रवेश गर्नेछ। पराजय वा नेट रनरेट कमजोर भएमा नेपाल समूह चरणमै सीमित हुनेछ।
कीर्तिपुरस्थित त्रिवि क्रिकेट मैदानमा टस जितेर फिल्डिङ रोजेको नेपालविरुद्ध पहिले ब्याटिङ गरेको जिम्बाबेले निर्धारित २० ओभरमा ६ विकेट गुमाउँदै १ सय २९ रन बनाएको थियो। जिम्बाबेका लागि केलिस ध्लोबुले सर्वाधिक ५२ रन जोडिन् भने विलभ्ड विजाले ३४ रनको योगदान दिइन्।
नेपालका तर्फबाट रिया शर्माले २ विकेट लिइन्। कविता कुँवर, पुजा महतो, सिता रानामगर र रुविना क्षेत्रीले समान एक-एक विकेट हात पारे।
१ सय ३० रनको लक्ष्य पछ्याएको नेपालले १९ ओभर ३ बलमै ४ विकेट गुमाएर लक्ष्य पूरा गर्यो। उपकप्तान पुजा महतोले ५० बलमा ४ चौका र २ छक्का प्रहार गर्दै ५२ रनको अविजित अर्धशतकीय इनिङ्स खेलिन्। रुविना क्षेत्री २ रनमा अविजित रहिन्।
ओपनर विन्दु रावल १५ रनमा एलबीडब्लु आउट भइन् भने कप्तान इन्दु बर्मा २२ रन बनाएर बोल्ड भइन्। सिता रानामगर ११ रनमा खेलिरहेका बेला चोटका कारण रिटायर्ड हर्ट भइन्।
