पोखरा महानगरपालिकाका मेयर धनराज आचार्यले निर्वाचन जितेपश्चात पोखरामा आफ्नो किताब बेच्न आईपुगेका महावीर पुनलाई कानुनी जटिलता उत्पन्न हुन सक्ने चेतावनी दिएका छन् । आज सामाजिक सञ्जाल फेसबुकमार्फत मेयर आचार्यले बिना दर्ता वा आवश्यक अनुमति कुनै पनि वस्तुको बिक्री–वितरण गर्नु गैर कानुनी भएको स्मरण गराएका हुन् ।
उनले लेखेका छन्– ‘बिना दर्ता वा आवश्यक अनुमति कुनै पनि वस्तुको बिक्री–वितरण गर्नु कानुनी रूपमा जटिल हुन सक्छ भन्ने कुरा तपाईंलाई अवगत नै छ ।’पछिल्ला केही दिनमा सडकमा उभिएर पुस्तक बिक्री गर्दा यातायातमा असहजता भएको तथा केही अनावश्यक सवाल–जवाफ भएको देखिएको उल्लेख गर्दै मेयर आचार्यले पुन जस्तो सम्मानित व्यक्तित्वलाई सुहाउने अवस्था नभएको पनि जिकिर गरेका छन् ।
फुटपाथमा साना व्यवसाय गर्ने व्यक्तिहरूलाई नगर प्रहरीले नियमअनुसार हट्न अनुरोध गरेको उल्लेख गर्दै आचार्यले त्यही नियम पुनमाथि पनि लागू हुने संकेत गरेका छने । जसकास कारण अनावश्यक विवाद सिर्जना हुनु उपयुक्त नहुने उनको भनाई छ ।
माननीयको भूमिका देशका लागि नीति र कानुन निर्माण गर्ने हो भन्दै आचार्यले पुस्तक ब्यबसायिको भूमिका पुस्तक बिक्री–वितरण गर्ने पनि प्रस्ट पारेका छन् । पुनको पुस्तकको स्टक उपलब्ध गराए पुस्तक व्यवसायी महासंघमार्फत विक्रि गरी उचित भुक्तानी उपलब्ध गराउने पनि मेयर आचार्यले जनाएका छन् ।
उनले लेखेका छन्–‘यदि तपाईंको पुस्तकको स्टक उपलब्ध गराउनु भयो भने, हामी महासंघमार्फत त्यसलाई बिक्री गरी उचित भुक्तानी तपाईंलाई उपलब्ध गराउन सहजीकरण गर्न सक्छौँ । ’
पुन हालसालै सम्पन्न प्रतिनिधि सभा सदस्यको निर्वाचनमा म्याग्दीबाट निर्वाचित सांसद हुन् । निर्वाचनको परिणाम आएलगत्तै उनी आफ्नो किताब बेच्न पोखराका चोकहरुमा देखिएका थिए । सो क्रममा स्थानीयसँगको नोकझोंक सहितको भिडियो सार्वजनिक भएको थियो । पोखरामा उनले त्यो दिन ८ सय थान किताब बेचेको पनि सार्वजनिक गरेका थिए ।
