अर्थमन्त्री रामेश्वर प्रसाद खनालले अर्थमन्त्रीसम्बद्ध बैक तथा वित्तीय क्षेत्रका नियामक निकायका प्रमुखहरुसँग विदाई भेटघाट गरेका छन् । अर्थ मन्त्रालयमा सोमबार छलफल भएको अर्थमन्त्रालयका प्रवक्ता टंकप्रसाद पाण्डेले जानकारी दिए ।
उनका अनुसार भेटघाटमा अर्थमन्त्री खनालले आफुलाई अर्थमन्त्रीको रुपमा रहदा समष्टिगत आर्थिक स्थायित्व कायम गर्न, लगानीका लागि उपयुक्त वातावरण निर्माण गर्न, पुँजी बजारलाई पारदर्शी र लगानीमैत्री बनाउन र आर्थिक सुशासन कायम गराउनका लागि नियामक निकायहरुले खेलेको भूमिका प्रति हार्दिक धन्यवाद प्रदान गरेका थिए ।
नियामक निकायका प्रमुखहरुले अर्थमन्त्रीसँगको सहकार्य फलदायी रहेको स्मरण गराउदै नेपालको बैक तथा वित्तीय क्षेत्रको विकास र वित्तीय अनुशासन कायम गराउनमा अर्थ मन्त्रालयले अवलम्बन गरेका नीति र मार्गनिर्देशनका लागि अर्थमन्त्रीप्रति आभार व्यक्त गरेका थिए ।
भेटघाटमा अर्थ मन्त्रालयका राजस्व सचिव भूपाल बराल समेतको उपस्थितिमा नियामक निकायहरुको तर्फबाट नेपाल राष्ट्र बैकका गभर्नर डा. विश्वनाथ पौडेल, नेपाल बीमा प्राधिकरणका अध्यक्ष श्री चन्द्रकला पौडेल र नेपाल धितोपत्र बोर्डका अध्यक्ष श्री सन्तोषनारायण श्रेष्ठको सहभागिता रहेको थियो ।
