म्याग्दी– म्याग्दीको मङ्गला गाउँपालिका–२ कुकुरबिसौनामा नयाँ सामुदायिक स्वास्थ्य एकाइ स्थापना गरिएको छ। गाउँपालिकाका अध्यक्ष सतप्रसाद रोकाले मंगलबार उक्त एकाइको उद्घाटन गर्दै स्थानीय बासिन्दालाई आधारभूत स्वास्थ्य सेवा उपलब्ध गराउन पालिका प्रतिबद्ध रहेको बताए। उनले गाउँको समग्र विकासलाई प्राथमिकतामा राखिएको पनि उल्लेख गरे।
वडाध्यक्ष धनबहादुर खाती क्षेत्रीका अनुसार यस स्वास्थ्य एकाइबाट करिब १३० परिवार प्रत्यक्ष रूपमा लाभान्वित हुनेछन्। अब स्थानीयलाई उपचारका लागि रणवाङ, अर्मन, कुहुँ, सिङ्गा र पुलाचौरसम्म जानुपर्ने बाध्यता हटेको छ।
यसअघि पनि गाउँपालिकाले बुकेनी, हिदी र धारामा सामुदायिक स्वास्थ्य एकाइ सञ्चालनमा ल्याइसकेको छ।
