तेहरान – पाकिस्तानी मध्यस्थकर्ताहरूले संयुक्त राज्य अमेरिका र इजरायलसँगको युद्ध अन्त्यको प्रयासमा समन्वयका लागि इरानको भ्रमणमा रहनुभएका पाकिस्तानका सेनाका कमान्डर फिल्ड मार्शल असिम मुनीरले बिहीबार इरानी संसदका सभामुख मोहम्मद बाघर गालिबाफसँग भेट गरेका छन् ।
इरानको सरकारी टेलिभिजनका अनुसार अमेरिका र इजरायलसँगको युद्ध अन्त्यको लागि थप वार्ता गर्ने बिषयमा इरानी प्रतिनिधिमण्डललाई शान्तिका लागि थप प्रयासबारे विश्वास दिलाउन र यसमा भाग लिन दबाब दिन मुनिरले इरान भ्रमण गरेका हुन् ।
‘हिजो इरान भ्रमणमा आएका पाकिस्तानी सेनाका प्रमुख मुनिरले इरानी सभामुख गालिबाफसँग भेट र कुराकानी गर्नुभएको छ,’ बिहीबार बिहान जारी रिपोर्टलाई उद्धृत गर्दै इरानी टेलिभिजनले उल्लेख गरेका छन् ।
सर्वोच्च नेता अली खामेनी र वरिष्ठ सुरक्षा अधिकारी अली लारिजनीको हत्यापछि जारी पाँच हप्ताभन्दा बढी लामो युद्धपछि गालिबाफलाई इरानको शीर्ष वार्ताकारको रूपमा हेरिएको छ । उहाँ गत सप्ताहन्तमा संयुक्त राज्य अमेरिकासँग पहिलो चरणको वार्ताका लागि पाकिस्तान गएका थिए ।
मुनिर आफ्नो प्रतिनिधिमण्डलसँग तेहरान पुगेको एक दिनपछि भएको पछिल्लो बैठकको विषयवस्तुको बारेमा थप विवरण सार्वजनिक गरिएको छैन । इरानको सरकारी टेलिभिजनले शान्ति योजनाको प्रस्तावलाई अमेरिकाद्वारा पठाइएको सन्देशको रूपमा वर्णन गरेको छ ।
इस्लामावादमा भएको पहिलो चरणको वार्ताले कुनै सम्झौता गर्न विफल भएपछि दुवै देशका प्रतिनिधि फिर्ता भएका थिए । यद्यपि, ह्वाइट हाउसकी प्रेस सेक्रेटरी क्यारोलिन लेविटले बुधबार पत्रकारहरूसँग थप वार्ता इस्लामाबादमा हुने सम्भावना रहेको पुष्टि गरेका छन् ।
सैन्य पोशाक लगाएका मुनिरले कालो सुट र टाई नलगाएको सेतो सर्ट लगाएका इरानको रिभोलुसनरी गाड्र्सका अनुभवी व्यक्तित्व गालिबाफले कालो सुट र सेतो सर्ट लगाउनुभएको बैठकको तस्वीर इरानी सञ्चारमाध्यमले दिएका छन् ।
गालिबाफ र उहाँको प्रतिनिधिमण्डलले शनिबार इस्लामावादमा अमेरिकी उपराष्ट्रपति जेडी भान्ससँग बन्द कोठामा वार्ता गरेका थिए, जुन सन् १९७९ को इस्लामिक क्रान्ति अघिदेखि इरान–अमेरिका बिचको उच्च स्तरीय सम्पर्क थियो ।
पाकिस्तानी विदेश मन्त्रालयका प्रवक्ता ताहिर अन्द्राबीले अर्को चरणको वार्ताको मिति तय नगरिएको बताएका छन् ।
इरानको प्रमुख वार्ताकारका रूपमा आफ्नो स्थितिलाई अझ बलियो बनाउँदै गालिबाफले बिहीबार लेबनानी संसदका सभामुख नबिह बेरीलाई टेलिफोन वार्तामा इरानमा युद्धविराम हुँदा लेबनानमा पनि युद्धविराम उत्तिकै ‘महत्त्वपूर्ण’ रहेको बताएका थिए ।
