अस्थायी रूपमा अमेरिकामा रहेका र स्थायी आवास अनुमति पत्र (ग्रिन कार्ड) लिन चाहने विदेशीले अबदेखि आफ्नै देश फर्किएर आवेदन दिनुपर्ने भएको छ ।
अमेरिकी नागरिकता तथा आप्रवासन सेवा(यूएस सीआईएस)ले नयाँ नीति मेमो जारी गर्दै ग्रीन कार्डका लागि आवेदन दिने अधिकांश आप्रवासीले अमेरिकाभित्रबाट स्थिति समायोजन गर्नुको सट्टा विदेशमै कन्सुलर प्रक्रिया अपनाउनुपर्ने जनाएको हो । मेमोमा आप्रवासन ऐनको धारा २४५ अन्तर्गतको ‘स्थिति समायोजन’ सामान्य प्रक्रिया नभई विवेक र प्रशासनिक अनुग्रहको विषय भएको उल्लेख छ ।
यूएस सीआईएस कानुनको “मूल उद्देश्य” तर्फ फर्किएको दाबी गरिएको यो नीति अमेरिकामा आप्रवासनमाथि कडा र नयाँ हो । नीतिले अवैध रूपमा अमेरिकामा बसिरहने प्रोत्साहन घटाउने र यूएससीआईएसका स्रोतहरू अन्य प्राथमिकतामा केन्द्रित गर्न सहयोग गर्ने बताइएको छ ।
मेमोमा संसद्ले आप्रवासी भिसा र समायोजन प्रक्रियाका लागि विस्तृत कानुनी संरचना बनाएको र स्थायी बसोबासको सामान्य मार्ग विदेशबाट कन्सुलर प्रक्रिया नै भएको दाबी गरिएको छ। गैरआप्रवासी भिसामा वा अस्थायी परोलमा अमेरिका आएका व्यक्तिहरू सामान्यतया आफ्नो अनुमति अवधि सकिएपछि देश छोड्ने अपेक्षा गरिने मेमोमा उल्लेख छ ।
यस नीतिले अमेरिकाभित्रैबाट ग्रीन कार्ड प्रक्रिया अघि बढाइरहेका केही अस्थायी भिसावाहक र परोलमा रहेका आवेदकहरूलाई प्रभाव पार्न सक्छ। मेमोले केही विशेष श्रेणी र कानुनी अपवादहरू भने यथावत् रहने जनाएको छ।शुक्रबारको नीति परिवर्तन अमेरिकी राष्ट्रपति डोनाल्ड ट्रम्पले संयुक्त राज्य अमेरिकामा आप्रवासनलाई कडा पार्न गत वर्षमा चालेका कदमहरूको शृङ्खलामा सबैभन्दा नयाँ हो ।
गत वर्ष, ट्रम्प प्रशासनले विद्यार्थीहरू, सांस्कृतिक आदानप्रदान आगन्तुकहरू र मिडियाका सदस्यहरूका लागि भिसाको अवधि छोटो पारेको थियो । एक वर्ष अघि ट्रम्पले पदभार ग्रहण गरेदेखि १ लाख भन्दा बढी भिसाहरू रद्द गरेको स्टेट डिपार्टमेन्टले जनाएको छ ।
