सिन्धुलीको कमलामाई नगरपालिकाका प्रमुख उपेन्द्र पोखरेलले वजारमा डोजर चलाउनुअघि भावुक स्ट्याटस लेखेका छन् । उनले शुक्रबार भत्काउन लागिएको स्टल बजारका ती दृश्यहरूले मेरो मन पनि निकै भारी बनाएको उल्लेख गरेका छन् ।
नगरप्रमुख पोखरेलले यो निर्णय सजिलो नभएको भन्दै धेरै रातहरू सोचेर, धेरै पटक छलफल गरेर र सबै पक्षको भावना बुझ्ने प्रयासपछि मात्रै यहाँसम्म आइपुगेका बताउदै आफु पनि यही नगरको नागरिक हुँ, यहाँका व्यापारी साथीहरूको दुःख, संघर्ष र पसिनाको मूल्य राम्ररी बुझेको बताएका छन् ।
उनले कहिलेकाहीँ नगरको सुरक्षा, कानुनी व्यवस्था र दीर्घकालीन हितका लागि आफ्नै मनमाथि ढुंगा राखेर निर्णय लिनुपर्ने भन्दै भत्किने संरचना केवल टहरा मात्र होइनन्, त्यहाँ जोडिएका धेरै सपना र सम्झनाहरू पनि छन् भन्ने कुरा महसुस गरेको बताए ।
उनले भनेका छन् – ‘यदि यस निर्णयले कसैको मन दुखेको छ भने, एक नगर प्रमुखको रूपमा म हृदयदेखि नै क्षमा चाहन्छु। तर विश्वास गर्नुहोस्, यो कदम कसैको भविष्य भत्काउन होइन, व्यवस्थित र सुरक्षित भविष्य निर्माण गर्नका लागि हो।’
नगरप्रमुख पोखरेलले अन्तमा लेखेका छन् – ‘आज मेरो मन पनि तपाईंहरूकै जत्तिकै भारी छ।’
