नेपाली कांग्रेसका निवर्तमान कार्यवाहक सभापति पूर्णबहादुर खड्काले पार्टीको एकता कायम गर्न विगत दुई महिनादेखि इमानदार प्रयास गरे पनि अपेक्षित प्रगति हुन नसकेको बताएका छन् ।
सामाजिक सञ्जाल फेसबुकमार्फत खड्काले पछिल्ला केही दिनयता पार्टीका विषयमा वास्तविकताभन्दा फरक हल्ला फैलाइएको र त्यसले सङ्गठनभित्र अन्योल सृजना गरेको दाबी गरेका हुन् ।
विशेष गरी १५औँ महाधिवेशनलाई लक्षित गरी नवीकरण गरिएका तथा नयाँ क्रियाशील सदस्यहरूलाई ‘अद्यावधिक’को नाममा दबाब दिइएको पनि खड्काले आरोप लगाएका छन् । यस्तो प्रवृत्ति पार्टी जीवनका लागि अत्यन्त घातक हुने चेतावनी दिदै खड्काले सम्बन्धित पक्षको ध्यानाकर्षण गराएका छन् ।
खड्काले सिनियर नेताहरूको क्रियाशील सदस्यता केन्द्रले स्वतः अद्यावधिक गरिदिने भन्ने विषयलाई ‘अफवाह’को संज्ञा दिए । महाधिवेशनमा सबै योग्य सदस्यको स्वतः सहभागिता सुनिश्चित गर्नु पार्टीको दायित्व रहेको खड्काको भनाइ छ ।
खड्काले आफू र पार्टी सभापति गगन थापाबिच ३१ दिनदेखि कुनै पनि प्रकारको सम्पर्क वा संवाद नभएको समेत स्पष्ट पारेका छन् ।
