काठमाडौँ । जिल्ला प्रशासन कार्यालय काठमाडौँले फिफा विश्वकप फुटबल २०२६ का खेल सार्वजनिक रूपमा प्रत्यक्ष प्रसारण वा प्रदर्शन गर्न चाहने संघसंस्था तथा कम्पनीलाई पूर्वस्वीकृति लिनुपर्ने व्यवस्था लागू गरेको छ।
कार्यालयले बिहीबार जारी गरेको सूचनामा काठमाडौं जिल्लाभित्र सामूहिक रूपमा विश्वकपका खेल प्रत्यक्ष प्रसारण गर्न वा ठूलो पर्दामा प्रदर्शन गर्न चाहने कुनै पनि संघसंस्था वा कम्पनीले जिल्ला प्रशासन कार्यालयबाट पूर्वस्वीकृति लिनुपर्ने उल्लेख गरेको छ।
सूचनाअनुसार स्वीकृतिविना रातिको समयमा ठूलो पर्दामा खेल प्रदर्शन गरी भीडभाड जम्मा गर्ने, समुदायमा असर पर्ने वा शान्ति–सुरक्षामा प्रतिकूल प्रभाव पार्न सक्ने गतिविधि गर्न नपाइने जनाइएको छ। यस्ता गतिविधिले सार्वजनिक व्यवस्था तथा सुरक्षा व्यवस्थापनमा चुनौती सिर्जना गर्न सक्ने भएकाले नियमनको व्यवस्था गरिएको कार्यालयले जनाएको छ।
प्रत्यक्ष प्रसारणका लागि स्वीकृति प्राप्त गर्न आवश्यक निवेदन ढाँचा जिल्ला प्रशासन कार्यालय काठमाडौँको वेबसाइटमार्फत उपलब्ध रहेको सूचनामा उल्लेख छ। प्राप्त निवेदनका आधारमा कार्यक्रम सञ्चालन हुने स्थान, सम्भावित भीड व्यवस्थापन, सुरक्षा संवेदनशीलता तथा अन्य आवश्यक पक्षको मूल्याङ्कन गरी अनुमति प्रदान गरिने जनाइएको छ।
कार्यालयले स्वीकृतिविना फिफा विश्वकप २०२६ को प्रत्यक्ष प्रसारण वा सार्वजनिक प्रदर्शनका नाममा भिडभाड गर्ने, अवाञ्छित गतिविधि सञ्चालन गर्ने वा कानुन विपरीत कार्य गरेको जानकारी प्राप्त भएमा प्रचलित कानुनबमोजिम कारबाही गरिने चेतावनी दिएको छ।
विश्वकप फुटबल प्रतियोगिताका खेलहरू सार्वजनिक स्थल, होटेल, रेस्टुरेन्ट, क्लब तथा अन्य व्यावसायिक स्थानमा सामूहिक रूपमा प्रदर्शन गर्ने प्रवृत्ति बढ्दै गएको सन्दर्भमा प्रशासनले शान्ति-सुरक्षा, भीड व्यवस्थापन तथा सार्वजनिक उत्तरदायित्वलाई ध्यानमा राखेर यो व्यवस्था लागू गरेको हो।
