काठमाडौँ । रौतहटको गढीमाई नगरपालिका-१ स्थित बागमती नदीमा डुबेर दुई बालकको मृत्यु भएको छ।
जिल्ला प्रहरी कार्यालय रौतहटका अनुसार समनपुर-हरैया घाटमा नुहाउने क्रममा स्थानीय भन्टु राय यादवका ८ वर्षीय छोरा अनिकेश यादव र सुरेश यादवका करिब ८ वर्षीय छोरा आदित्य यादव नदीमा बेपत्ता भएका थिए।
घटनाबारे जानकारी प्राप्त भएपछि इलाका प्रहरी कार्यालय समनपुरबाट प्रहरी निरीक्षक मुना पासवानको नेतृत्वमा प्रहरी टोली तत्काल घटनास्थल पुगेर खोज तथा उद्धार कार्य सुरु गरेको थियो।
खोजीका क्रममा घटनास्थलबाट करिब ५० मिटर दक्षिणतर्फ बागमती नदीभित्रै दुवै बालकको शव फेला परेको जिल्ला प्रहरी कार्यालय रौतहटले जनाएको छ।
प्रहरीले घटनाबारे आवश्यक अनुसन्धान अघि बढाएको छ।
