रूपन्देही । लुम्बिनीमा नेपाली कांग्रेस इतर समूहका निवर्तमान सभापति शेरबहादुर देउवा समूहको अन्तिम प्रदेश भेला आज मंगलबार हुँदैछ ।
विशेष महाधिवेशनभन्दा बाहिर रहेका यो समूहले यसअघि तयारी नपुगेर रोकेको लुम्बिनी प्रदेशस्तरीय भेला दाङको लमहीमा गर्दैछ ।
पार्टीमा बृहत् एकता कायम गर्ने, विशेष महाविधेशनका कारण छोडिएका, निराश भएका नेता कार्यकर्तालाई पार्टीको मूल प्रवाहमा ल्याउने र समसामयिक राजनीतिको समीक्षा गर्ने ३ उद्देश्यसहित देउवा समूहले ७ प्रदेशमा भेला गर्ने निर्णय गरेको थियो ।
यसअघि ६ प्रदेशमा भेला गरिसकेको समूहले आज अन्तिम प्रदेश भेला गर्न लागेको हो । यो समूहका प्रदेश कार्यक्रम संयोजक नेता गेहेन्द्र गिरीले सातै प्रदेशमा तय गरेका भेलाको अन्तिम भेला लमहीमा गर्न लागिएको जानकारी दिए ।
भेलामा लुम्बिनी प्रदेशका विशेष महाधिवेशनको पक्षमा नदेखिएका नेता कार्यकर्ता सहभागी हुने उनले बताए । देउवा अहिले विदेशमा रहेकाले समूहको नेतृत्व नेता पूर्णबहादुर खड्काले गर्दै आएका छन् । भेलामा नेता गुरू बराल, निवर्तमान सहमहामन्त्री किशोरसिंह राठोरलगायतका नेताले सम्बोधन गर्ने नेता गिरीले बताए ।
यसअघि प्रदेशबाट देउवा समूहमा रहेका नेता भने धेरै साथमा छैनन् । नेतृ पुष्पा भुसाल देउवाको साथ छाडेर उपसभापति बनेकी छन् भने बालकृष्ण खाण, विनोद चौधरी, देवेन्द्रराज कंडेललगायतका नेताले पनि संस्थापन समूहलाई नै साथ दिएका छन् ।
