काठमाडौँ । शिक्षा तथा खेलकुद मन्त्री सस्मित पोखरेलले नेपालभित्रै गुणस्तरीय शिक्षा सुनिश्चित गर्ने सरकारको लक्ष्य रहेको बताएका छन्। उनले शिक्षित युवाको सक्रिय सहभागिताबिना समृद्ध र विकसित समाज निर्माण सम्भव नहुने उल्लेख गरेका छन्।
काभ्रेपलान्चोकको धुलिखेलस्थित काठमाडौँ विश्वविद्यालयको ३१औँ दीक्षान्त समारोहलाई सम्बोधन गर्दै मन्त्री पोखरेलले युवाको अपेक्षाअनुसारको समुन्नत समाज निर्माणका लागि सरकार प्रतिबद्ध रहेको बताए। सो लक्ष्य हासिल गर्न शिक्षित जनशक्तिले सिर्जनात्मक र जिम्मेवार भूमिका निर्वाह गर्नुपर्ने उनको भनाइ थियो।
उनले काठमाडौँ विश्वविद्यालयबाट हालसम्म ५१ हजारभन्दा बढी दक्ष जनशक्ति उत्पादन भइसकेको उल्लेख गर्दै उनीहरूले आफ्नो ज्ञान, सीप र अनुभव राष्ट्र निर्माणमा उपयोग गरी सरकारसँग सहकार्य गर्नुपर्ने अपेक्षा व्यक्त गरे।
दीक्षित विद्यार्थीलाई सम्बोधन गर्दै मन्त्री पोखरेलले विदेश मोहभन्दा स्वदेशमै अवसर खोज्न र उपलब्ध ज्ञानको प्रयोग नेपालकै विकासमा गर्न आग्रह गरे। सरकारले देशभित्रै अवसर सिर्जना गर्ने दिशामा काम गरिरहेको उल्लेख गर्दै उनले नेपालमै भविष्य निर्माण गर्न सकिने विश्वास व्यक्त गरे।
समारोहमा मन्त्री पोखरेलले विभिन्न शैक्षिक कार्यक्रमका स्नातक तथा स्नातकोत्तर तहका विद्यार्थीलाई उपाधि तथा शैक्षिक प्रमाणपत्र प्रदान गरेका थिए।
कार्यक्रममा काठमाडौँ विश्वविद्यालयका उपकुलपति प्रा. डा. ऋषिकेश वाग्लेले कृत्रिम बुद्धिमत्ता र स्वचालन (अटोमेशन) को तीव्र विकाससँगै प्राविधिक दक्षतामात्र पर्याप्त नहुने उल्लेख गर्दै विवेक, नैतिक मूल्य, सांस्कृतिक चेतना र राष्ट्रप्रतिको उत्तरदायित्वलाई पनि समान रूपमा आत्मसात् गर्नुपर्नेमा जोड दिए।
